Duket se Partia Socialiste e Librazhdit ka ‘ngrohur’ motorrët dhe po bëhet gati për zgjedhjet e 14 Maji. Kandidati për Bashkinë e Librazhdit Ermal Kurti, bashkë me kryesinë e partisë ka nisur takimet me strukturat drejtuese, në fshatra fillimisht.
Me mbështetjen e kryetares së Partisë Socialiste për Librazhdin Bardha Qatja dhe të deleguarit të partisë për Librazhdin, Erald Xhani, Kurti ka nisur të mbajë fjalimet e para përpara strukturave si kandidat i ardhshëm i Bashkisë Librazhd.
I detyruar nga zori dhe halli edhe kryetari aktual i bashkisë, Kastriot Gurra, është detyruar të dalë në mbështetje të Kurtit nëpër takime edhe pse në krahun tjetër po provon në të gjitha mënyrat, një shans të fundit në moment të fundit për të ndryshuar kandidat.
Kjo pasi emri i Ermal Kurtit edhe pse është konfirmuar në bazë si kandidat për kryetar bashkie ende nuk është nxjerrë zyrtarisht nga zyrat e partisë dhe të bëhet prezantimi i tij zyrtar nga deputeti i qarkut Damian Gjiknuri. U prit që ky prezantim zyrtar të bëhej këtë javë por axhenda e Gjiknurit bëri që të shtyhej.
- Ndërkohë që pritet java e ardhshme dhe cdo gjë mund të ndodhë deri në momentin e fundit, të gjithë po luajnë shanset e tyre me mënyrat e tyre.
