Grupi i ndihmës së Gjysmëhënës së Kuqe Turke u sulmua sot nga opozita dhe mediat turke, sepse në vend që të dhuronte, u shiti tenda të mbijetuarve të tërmetit të 6 shkurtit që shkatërroi Turqinë juglindore.
Sipas gazetës Cumhuriyet, e cila bëri të ditur historinë, Gjysmëhëna e Kuqe Turke i shiti 2050 tenda – të destinuara për të mbijetuarit – OJQ-së bamirëse Ahbap për 46 milionë lira turke (2.4 milionë dollarë).
Këto tenda u transportuan dhe u vendosën në zonat e prekura nga tërmeti, tha sot OJQ në Twitter.
Qeveria turke është akuzuar se nuk ka shpërndarë një numër të mjaftueshëm tendash, ndihma humanitare dhe nuk ka vendosur ekipe të mjaftueshme ndihme në shumë vende në ditët pas tërmetit.
Organizatat joqeveritare, duke përfshirë bamirësinë Ahbap dhe vullnetarët ndihmuan në plotësimin e boshllëqeve.
Gjysmëhëna e Kuqe Turke, duke pasur statusin e sindikatave, punon ngushtë me autoritetet turke dhe përfiton nga fushatat e shumta zyrtare të donacioneve.
Liderët e opozitës kërkuan dorëheqjen e kryetarit të Gjysmëhënës së Kuqe.
“Turp të kesh!” shkroi presidentja e Partisë së Mirë nacionaliste (Iyi), Meral Aksener.
Javën e kaluar, presidenti turk, Rexhep Tajip Erdogan akuzoi kritikët e Gjysmëhënës së Kuqe si “të pandershëm dhe të poshtër”.
