Përplasje e fortë mes deputetit Agron Çela, i shndërruar në socialist pak javë më parë dhe kandidatit të Edi Ramës për bashkinë e Shkodrës, Benet Beci.
Të premten në orën 17:00 në një kompleks funeralesh, mbështetës të PS ishin mbledhur të ftuar nga Agron Çela për të prezantuar kandidatin Beci i cili garon në zgjedhjet vendore të 14 majit.
Mirëpo zhvillimet kanë qenë të papritura dhe ka ndodhur e paimagjinueshmja.
Shkak është bërë prishja e pazareve mes të dyve i pasuar nga një konflikt që duket se s’do të kalohet lehtë.
Burime për Syri.net bëjnë të ditur se kulmi i nervozitetit arriti kur pjesëmarrësve u folën koordinatori i PS në Shkodër, Edmond Ndou dhe e deleguara e partisë, Elisa Spiropali, duke artikuluar justifikime qesharake lidhur me mungesën e kandidatit, por edhe deputetit të zonës.
Takimi mësohet se ka zgjatur më pak se 18 minuta dhe simpatizantët janë ndjerë të keqpërdorur dhe janë larguar me urgjencë.
Ndërkohë, nga 500 pjesëmarrës të parashikuar, nuk kanë marrë pjesë as 200 persona ç’ka i ka detyruar organizatorët të heqin karriget nga salla.
Të njëjtat burime saktësojnë për Syri.net gjithashtu se PS e Shkodrës është ndarë në dy kampe, ata që mbështesin Agron Çelën dhe të tjerët Benet Becin.
Shkak për përplasjen mësohet të jetë ndarja e ofiqeve të pushtetit dhe secila palë kërkon të promovojë “ushtarët” e vet dhe me afrimin e fushatës zgjedhore, dy grupimet në PS kërkojnë të kenë rol vendimmarrës.
Megjithatë, situata ku ndodhet PS-ja e Shkodrës, e përçarë sa më s’ka, një rezultat pozitiv i PS-së në kryeqendrën e veriut është thjeshtë një mirazh i largët për Edi Ramën dhe Benet Becin.
