Ambasadori i Ukrainës në Tiranë, Volodymyr Shukrov, është shprehur në 15 vjetorin e Pavarësisë së Kosovës se sapo lufta në vendin e tij të përfundojë, hapi i dytë do të jetë njohja e shtetit ballkanik.
“[…] Ukraina sot ndodhet në zjarrin e luftës dhe pasi të dalim nga kjo luftë mund t’iu rikthehemi temave të tjera. Sot për sot gjëja më e rëndësishme është të fitojmë luftën dhe të dalim nga ky tmerr, Kosova do të jetë hapi i dytë”, ka thënë ambasadori.
Shukrov ka treguar se situata në Ukrainë është shumë e tensionuar aktualisht, ndërsa lufta për pak ditë shënon njëvjetorin e nisjes së saj. Sipas tij, zonat të cilat janë pjesë e Ukrainës por kanë qenë nën pushtimin rus, janë marrë mbrapsht dhe janë të çliruara.
“Një situatë shumë e ndërlikuar është aktualisht. Nëse flasim edhe për gjysmën e Ukrainës zona që kanë qenë të okupuara nga rusët tani janë të çliruara. Tani na ngelet edhe një pjesë tjetër për tu çliruar. Zona e frontit është 1500 km aktualisht, nëse marrim një zonë në tërësi të frontit janë mbi 3000 km është një linjë shumë e gjerë por ne jemi gati të rikthejmë edhe territoret e tjera të Ukrainës”, është shprehur Volodymyr Shukrov.
Ndërkohë, ambasadori ka folur edhe për mbështetjen që Shqipëria i ka dhënë Ukrainës në këto kohë të vështira, duke thënë se është shumë mirënjohës për mbështetjen.
“E kam nënvizuar rolin e ndihmës që ne kemi marrë nga Shqipëria. Na ka mbështetur në shuma aspekte si në nivele bilaterale, si në ato ndërkombëtare edhe si pjesëmarrja e OKB por gjithashtu kam vlerësuar edhe ndihmën nga populli shqiptar i cili na ka mbështetur”,tha ambasadori ukrainas.
