Kryedemokrati Sali Berisha ka njoftuar se nesër do të jetë protesta e radhës që do të zhvillojë opozita në Tiranë, në hyrje të Kuvendit. Në një deklaratë për mediat nga selia blu, Berisha tha se kryeministri Rama nuk duhet të marrë pjesë në seancë.
“Nesër është një ditë prove, provë e fortë. Protesta është thirrur në ora 10.00 sepse atëherë Rama-Gonigali hyn në Parlament. A ka përdhosje më të madhe se hyrja si kryeministër i Rama-Gonigalit. A ka përdhosje më të madhe se fjala e tij aty?! Prandaj siç zhvilluam të hënën që kaloi një protestë të shkëlqyer, u bëj thirrje të vini nesër në protestë”, u shpreh ai.
Më tej, ish-kryeministri bëri me dije se Partia Demokratike do të mobilizojë të gjithë forcat e saj për një tjetër protestë kombëtare më 3 Mars. Po në këtë ditë, Gjykata e Apelit ka njoftuar mbajtjen e seancës për vulën dhe logon e PD.
“PD e ka vendimin e gjykatës. Gjykimi tani është për të pranuar palët e Alibashës. Pse e bëri Blerina Muçi nën ndikimin absolut të Edi Ramës dhe Yuri Kim, të vërtetuara, të tjerët nuk mund ta bëjnë një akt të tillë. Se përmbyset sistemi i drejtësisë nëse ti bën palë atë që nuk është palë.
Objekti ynë është Edi Rama. Një armik i egër që po bën gjithçka për të shpëtuar lëkurën e tij. Ka kryer akte pabesie ekstreme ndaj SHBA, NATO, sigurisë së tyre, por dhe akte antikushtetuese ndaj demokracisë dhe pluralizmit në Shqipëri.
PD do mobilizojë të gjitha forcat e saj për një protestë të jashtëzakonshme më datën 3 Mars. Revolucioni fton çdo shqiptar të marrë pjesë dhe të çojë përpara kauzën e tij”,u shpreh Sali Berisha, kryetar i PD.
