Zhduket Edi Rama. Seanca e sotme e parlamentit të Shqipërisë u dominua për herë të dytë resht nga i njëjti skenar, kaos, përplasje dhe përjashtime, por në fund kauza duket se ka shërbyer për bashkimin e PD-së, të paktën për komisionin hetimor kundër Edi Ramës lidhur me dosjen “McGonigal”. Ishte e pritshme që seanca e sotme do të ishte e fortë.
Por fati i saj u pa që në fillim. Edi Rama vendosi që për herë të dytë të mungonte. Herën e parë për arsye shëndetësore. Sot nuk kishte asnjë arsye. E ndoqi nga televizori duke i hedhur “benzinë” zjarrit me postime kundër PD-së. Opozita e ndarë në dy grupe bashkohej në një pikë, që Edi Rama duhet të jepte shpjegime për dosjen amerikane.
PS pranoi kërkesën e grupit të Enkelejd Alibeajt për interpelancë, por kryeministri ia delegoi përgjigjet Elisa Spiropalit. Gazment Bardhi nuk e pranoi dhe reagoi ashpër. Lindita Nikolla e përjashtoi me argumentin se i tha “je kukull e Edi Ramës”.
Në krahun tjetër grupi i Berishës bllokoi foltoren duke kërkuar ndryshimin e rendit të ditës dhe mocion me debat sërish për dosjen “McGonigal”. Pavarësisht bilbilave dhe grushteve ndaj tavolinave, PS nuk e pranoi duke e rrëzuar për herë të dytë.
Në fund përballë kaosit të krijuar, PS vendosi të kalonte ligjet me shpejtësi pa diskutim, madje disa prej tyre nuk të pashqetësuar nga gjithçka që po ndodhte, si rasti i Eduart Shalsit luanin të qetë shah në kompjuter, ndërsa Baftjar Zeqaj votonte me të dyja duart edhe për kolegen e tij.
Situata e krijuar bëri që dy grupet brenda PD-së, por edhe Partia e Lirisë të bashkojnë votat duke firmosur ngritjen e një komisioni hetimor për kryeministrin Edi Rama lidhur me dosjen “McGonigal”. Në seancë e sotme Sali Berisha nuk ishte për shkak të përjashtimit seancën e kaluar me 10 ditë.
