Numri i të vdekurve nga shiu i rrëmbyeshëm në Zelandën e Re u rrit në katër sot, ndërsa përmbytjet dhe rrëshqitjet e dheut vazhduan për të tretën ditë në ishullin verior të vendit.Auckland, qyteti më i madh i Zelandës së Re i cili është prekur nga përmbytjet që nga e premtja ka mbetur në gjendje të jashtëzakonshme.
Shërbimi meteorologjik i vendit, MetService ka paralajmëruar për mot më të ashpër sot dhe nesër në ishullin verior të Zelandës së Re. Shirat e dendur mund të shkaktojnë përmbytje të shpejta, parashikoi ai.
Një burrë që u zhduk pasi u përfshi nga uji në një fshat rreth 70 km në jug të Auckland është konfirmuar i vdekur.
Ndryshimet klimatike po bëjnë që ngjarjet e reshjeve të mëdha të rriten në frekuencë dhe intensitet në Zelandën e Re, megjithëse ndikimi i tyre ndryshon sipas rajonit.
Policia tha sot se po ndihmonte me menaxhimin e trafikut për shkak të mbylljes së rrugëve në rajonin Waitomo pasi shirat e rrëmbyeshëm shkaktuan një numër rrëshqitjesh, përmbytjesh dhe dëmtimesh në rrugë.Mijëra shtëpi mbeten pa energji elektrike, ndërsa qindra janë pa ujë, sipas autoriteteve.
Pavarësisht kësaj, fluturimet ndërkombëtare të Air New Zealand për dhe nga Auckland do të rifillojnë sot në mesditë.
Kryeministri i Zelandës së Re, Chris Hipkins i cili ka qenë në detyrë për më pak se një javë, fluturoi me helikopter mbi Auckland për të vëzhguar dëmet dhe vizitoi zonat me shtëpi të dëmtuara nga përmbytjet.
Ai e përshkroi ndikimin e përmbytjeve në qytet si “të paprecedentë” në kujtimet e fundit.
