Deputetja e PD-së, Jorida Tabaku u shpreh sot kundër kryetarit të grupit Enkelejd Alibeaj që përjashtoi katër deputetë. Ajo tha se nuk është kjo “mënyrë si bashkohet PD” duke kërkuar hapa nga dy palët për të dalë me një kandidat në zgjedhje.
“Ka prioritet të diskutojmë për hallet e qytetarëve, pastaj për hallet tona. Besoj që të gjithë më keni ndjekur në diskutimet e mia, jam përpjekur për të qenë konstruktive. Mua nuk më ka thirrur askush dhe nuk kam asnjë dijeni, që po mblidhen firma.
Unë kam vetëm një qëllim në parlament dhe PD, ta bëjmë forcë fituese, alternativë. Për mua është e papranueshme që sot opozita është më pak e besueshme se qeveria. Nuk mendoj se PD duhet të arrinte në këtë pikë.
Ka një kryetar grupi që në të mirë dhe të keq e ka ushtruar funksionon. Nuk është kjo mënyrë si bashkohet PD. Nuk duhet ta copëzojmë, por të dalim me kandidatë të përbashkët” tha ajo.
