Personat me aftësi të kufizuara në Elbasan, kanë hyrë sot në ditën e tretë të grevës së urisë. Ata thotë se nuk kanë parë asnjë reagim nga institucionet përgjegjëse, edhe pse kërkojnë paratë e tyre, pagesat që u janë hequr nga KEMP-i.
“I bëj thirrje Qeverisë, Kryeministrit, Ministres së Shëndetësisë ta kthejnë kokën mbrapa, një herë nga këta, se pjesë e shqiptarëve janë dhe këta. Unë jam i besimit Ortodoks, mbrëmë duhet të isha edhe unë pranë familjes tu bëja qejfin fëmijëve të mi, tu mbushja tryezën si ditë festash. Une gjendem këtu, jo pranë familjes”, është shprehur një prej grevistëve.
Sipas tyre, një pjesë e pagesave të invaliditetit u janë hequr dhe në këto kushte ata nuk mund të përballojnë dot jetesën.
“Ne e dimë sa vuajmë me këta fëmijë që i kemi mbi kurriz, dhe tani të hiqet kjo, duket shumë e padrejtë. U detyrova të hy në grevë se ma kanë çuar kategorinë 10 mijë lekë. 10mijë lekë nuk më dalin as për ilaçe, as për ujë e drita, apo të ushqehem, jo të mbaj familjen”, vijuan ata.
Përfaqësues të tyre thanë se do ta vijojnë grevën e tyre deri në një zgjidhje të këtij problemi, ndërsa deklaruan se asnjë institucion nuk ka shkuar të interesohet për ta.
