Koka e grupit shqiptar të “Call Centerave” që mashtronin me kriptovaluta të rreme duke u vjedhur miliona euro shtetasve europianë është arrestuar në Barcelonë.
Lajmin e bëjnë me dije mediat spanjolle, duke thënë se ai është arrestuar nga Mossos d’Esquadra dhe Garda Civile sapo ka zbritur në Barcelonë, pas fluturimit nga Rumania. Identiteti i tij nuk bëhet i ditur.
Hetuesit spanjollë thonë se i arrestuari ishte përgjegjës për menaxhimin e të gjitha viktimave spanjolle, përmes programit Everfx, një skemë mashtrimi me kriptomonedha online, duke i premtuar viktimave një investim fillimisht prej 250 euro.
Arrestimi i tij lidhet me operacionin e zhvilluar më 8 nëntor nga forcat policore të Gjermanisë, Suedisë, Finlandës, Letonisë, Ukrainës, Gjeorgjisë, Shqipërisë dhe Spanjës, të koordinuar nga Eurojust, i cili përfshinte çmontimin e kësaj organizate të madhe kriminale. Ajo operonte përmes qendrave të telefonatave nga vende jashtë Bashkimit Evropian, duke kryer operacione mashtruese që sollën miliona euro fitime.
Në atë kohë bilanci ishte 15 call center të shkatërruara, si dhe arrestimi i dy drejtuesve kryesorë të organizatës në Shqipëri dhe 16 personave të tjerë nën hetim. Gjithashtu, urdhërarrestet ndërkombëtare janë lëshuar për personat më përgjegjës për rrjetin kriminal, i cili ka mundësuar arrestimin e këtij lideri në Katalonjë.
Sipas hetuesve, rrjeti fitonte 400 euro në minutë duke kryer aktivitete mashtruese, duke arritur plot 50 milionë euro në tremujor. Numri i viktimave arrin në qindra mijëra, kryesisht në Evropë.
Forcat e policisë spanjolle vazhdojnë të gjurmojnë 476 platformat mashtruese të lidhura me organizatën kriminale në mënyrë që të prekurit të jenë në dijeni të këtyre fakteve dhe të paraqesin ankesat e duhura.
