Eurodeputetja greke Eva Kaili ka mohuar përfshirjen e saj në një skandal të marrjes së ryshfetit në Katar. Ajo është një nga katër të dyshuarit e akuzuar, pasi hetuesit belgë gjetën shuma të mëdha parash dhe një valixhe në shtëpitë e të akuzuarve.
Eurodeputetët kanë votuar pro vendimit për të larguar Kailin nga roli i saj si zëvendëspresidente, nga Parlamenti Europian. Ajo është pezulluar gjithashtu nga Grupi i Socialistëve dhe Demokratëve në parlament, si dhe është përjashtuar nga partia e qendrës së majtë greke, Pasok.
Autoritetet greke kanë ngrirë pasuritë që i përkasin asaj, bashkëshortit dhe familjarëve të saj. Aktivitetet e një kompanie pronash të ngritur rreth dy javë më parë nga eurodeputetja dhe bashkëshorti i saj në Athinë, janë ngrirë gjithashtu.
Ndërsa Kryetarja e parlamentit, Roberta Metsola, ka folur për “ditë të vështira për demokracinë evropiane”.
“Eva Kaili deklaron pafajësinë e saj dhe ajo nuk ka asnjë lidhje me marrjen e ndonjë ryshfeti nga Katari,” tha avokati i saj, Michalis Dimitrakopoulos.
Prokurorët belgë urdhëruan kryerjen e një sërë kontrollesh, duke thënë se 600,000 € u gjetën në shtëpinë e një të dyshuari, 150,000 € në banesën e një eurodeputeti dhe disa qindra mijë euro në një valixhe në një dhomë hoteli në Bruksel.
Eva Kaili aktualisht po qëndron në burgun e grave të Saint-Gilles në Belgjikë. Ajo po përballet me akuza të rënda për korrupsion, pastrim parash dhe pjesëmarrje në organizatë kriminale.
