Në mesin e muajit shtator 2022 në median shqiptare u publikua gjerësisht një artikull i medias meksikane “El Universal” ku ngriheshin dyshime se disa shtetas shqiptar, Luftar Hysa dhe Fatos Hysa, bashkëpunonin me kartelin famëkeq meksikan“Sinaloa”, duke pastruar paratë e këtij karteli, përftuar kryesisht nga trafiku i lëndëve narkotike, nëpërmjet investimeve në fushën e turizmit dhe lojërave të fatit, kazinove në Shqipëri.
Lexo lajmin e “El Universal”
https://www.eluniversal.com.mx/nacion/niegan-vinculo-de-narco-con-hermanos-hysa?amp
https://www.eluniversal.com.mx/nacion/cartel-de-sinaloa-se-alia-con-mafia-albanesa
Gjatë një interviste për emisionin “Opinion” në 20 Shtator të këtij viti, Luftar Hysa, tentoi të sqaroj pozicionin e tij me argumente jo shumë bindëse, si në rastin ku përmend se Meksika ka një sistem drejtësie funksional dhe të pavarur.
Shiko videon e emisionit “Opinion”:
Gjithsesi gjatë intervistës Hysa ndër të tjera theksoi se në asnjë moment ai apo të afërmit e tij nuk kanë qenë subjekt hetimi nga organet ligjzbatuese në Shqipëri. (Shiko minutën 29:18) tek video e emisionit.
Por portali Timoni.al ka investiguar çështjen prej disa muajsh dhe disponon fakte se autoritetet shqiptare kanë hetuar pikërisht për pastrim parash vëllain e tij, Fatos Hysën.
Burime konfidenciale, në Prokurorinë e Përgjithshme, kanë bërë me dije për Timoni.al se në Mars të vitit 2013 Prokuroria e Rrethit Gjyqësorë Elbasan kishte regjistruar procedimin penal për veprën penale të “Pastrimit të produktit të veprës penale ose veprimtarisë kriminale”, për shtetasin Fatos Hysa, vëllain e Luftar Hysës.
Autoritetet shqiptare kishin të dhëna se në emër të shtetasit Fatos Hysa dhe vëllait të tij Luftar Hysa, me banim në Meksikë ishin kryer transfertatë dyshimta dhe në vlera të konsiderueshme parash. Në periudhën 2008-2012, shtetasi Fatos Hysa, nëpërmjet këtyre transfertave, kishte përfituar shumën prej 234.698 mijë dollar.
Në atë periudhë Fatos Hysa në deklarimin para autoriteteve të prokurorisë së Elbasanit kishte sqaruar se ushtronte aktivitet privat në fushën e këmbimit valutorë në qytetin e Belshit, ndërsa vëllai i tij, Luftar Hysa kishte një rrjet kazinosh në Meksikë. Lidhur me transfertat e parave prej vitit 2008 deri në vitin 2012, të kryera në emër të shoqërisë së tij, Fatos Hysa ka shpjeguar se këto shuma parash i ka dërguar vëllai i tij Luftari për arsye të ndërtimit të një shtëpie në Belsh. Gjithashtu, dërgesat e parave kanë qenë dhe për një të afërmin e tyre cili ka qenë i sëmurë.
Prokuroria e Elbasanit nëpërmjet Ministrisë së Drejtësisë së Republikës së Shqipërisë i dërguan letër porosi autoriteteve Meksikane, Kanadeze, Greke dhe të Afrikës së Jugut mbi aktivitetin e vëllezërve Hysaj. Në mungesë të përgjigjes nga autoritetet e vendeve të mësipërme prokurori i çështjes vendosi në dhjetor 2014-ës të pezulloi çështjen në ndaj Fatos Hysës dhe të arkivojë dosjen.
Vlen të përmendet se Prokuroi i cili mori vendimin e mësipërm është larguar nga sistemi si pasojë e Reformës në Drejtësi.
