Ish-kryeministri Sali Berisha ka shpërndarë këtë të mërkurë disa pamje nga protesta që ai thirri dhe organizoi dje në mes të Tiranës, në Bulevardin “Dëshmorët e Kombit”. Aty pati dhe një incident kur u sulmua nga një person i identifikuar si Gert Shehu.
“Mirënjohjet më të pakufijshme”, shkruan Berisha teksa ndan dhe disa fjalë nga fjalimi i tij para popullit demokrat që kishte dalë dje në shesh.
”Sot është dita kur Europa dhe bota mund të njihen me të vërtetat e Shqipërisë. Ky samit është një mundësi që shqiptarëve t’ju dëgjohet zëri. Ndaj siç e kërkon tradita jonë, miqve do u themi të vërtetën.
Ne nuk jemi këtu në një manifestim festiv siç do të donim të ishim. Ne jemi këtu në një protestë, me qëllimin më madhor, që sot të jehojë para liderëve, mediave, edhe zëri i popullit të opozitës shqiptare”,- janë fjalët që ka shpërndarë Sali Berisha, të cilat i tha dhe në protestë.
