Zbardhen detaje nga laboratori i kokainës që u zbulua dhe u godit në Frakull të Fierit.
Gazetari Eni Ferhati u shpreh se një nga personat e arrestuar për kokainën komunikonte me një polic i cili nuk ishte në dijeni për aktivitetin.
Ferhati sqaroi se është zbardhur vetëm gjysma e transkriptimeve që ka arritur të sigurojë SPAK në bashkëpunim me policinë.
“Mund t’ju konfirmoj faktin se është identifikuar dhe një kolumbian i dytë, kimisti i dytë i cili do të vinte në Shqipëri. Unë disponoj emrin e tij, por për arsye sekreti hetimor nuk po e bëj me dije.
Kolumbiani i dytë në fakt, rezulton të ketë udhëtuar në të njëjtën ditë me Samir Rodriguez nga Athina në drejtim të Podgoricës, por ndryshe nga kolumbiani tjetër ky shtetas nuk ka ardhur në Shqipëri” u shpreh gazetari.
Më 26 nëntor Gjykata e Posaçme la në fuqi masën e “arrestit me burg” për 10 personat e arrestuar për 430 kilogramë kokainë të trafikuar përmes 24 toneve pleh organik artificial.
Laboratori i drogës u zbulua në banesë e ish-kryetarit të Komunës Frakull, Viktor Çervanaku në Fier.
Mësohet se 430 kilogramë kokainë që ndodheshin brenda plehut, u transportua nga Kolumbia fillimisht në portin e Pireut në Greqi, më pas në Portin e Barit në Itali, Mal të Zi dhe destinacion të fundit, Shqipërinë.
Deri më tani janë arrestuar 10 persona ku mes tyre është edhe drejtori i drejtorisë në OSHEE, Viktor Çervanaku dhe i vëllai, Zenel Çervanaku.
Të arrestuarit e tjerë, janë Denilson Çervanaku, Enxhi Ferhati, Nikolin Gjolena, Klajdi Vrioni (Kodra), Julain Malaj, Redion Meshi, Bledar Matoshi dhe Marildo Rona.
