Gazeta e njohur në Madrid “El Pais” i ka kushtuar një artikull të gjatë bastisjeve që bëri policia spanjolle në disa qytete të Shqipërisë pak ditë më parë në operacionin kundër mashtrimit me call center-at.
Gazeta thotë se janë më shumë se 200 mijë europianë të mashtruar nga rrjeti kriminal në Shqipëri por edhe vende të tjera të Europës. Dje Europol njoftoi se një hetim ndërkombëtar ka identifikuar disa nga rrjetet kriminale pas më shumë se 470 faqeve që janë mbyllur.
“Autoritetet spanjolle morën pjesë në bastisjen shqiptare, burimi kryesor i thirrjeve të marketingut për viktimat në gadishullin Iberik. Një urdhër-arresti është lëshuar për Amant J., një pronar call-center me lidhje të nivelit të lartë me qeverinë shqiptare, i cili është edhe këshilltar në ministri” thuhet në artikullin e mediave spanjolle.
Por kush është Amant J.?
Pak ditë më parë Sali Berisha denoncoi një skemë mashtrimi dhe pas saj akuzoi se qëndron Amant Josifi, që sipas tij është pas rrjetit të “call centera”-ve, ku janë mashtruar shumë qytetarë evropiane. Sipas kreut të PD-së, ky biznesmen ka mbështetjen e Olsi Ramës. .
“Këtu kam denoncuar vjedhjet që po bëhen me bitcoin. Këtu kanë zbarkuar policitë e vendeve të BE-së, sepse rrjeti i ‘call center’-ave i identifikuar tani të një biznesmeni që quhet Amant Josfi, biznesmen pushteti ai që ka mbulimin e plotë të Olsi Ramës, u ka vjedhur qytetarëve evropian 2.2 miliardë euro.
Duke i joshur, duke i mashtruar, blini bitcoin dhe vendoseni në këtë aplikacion se kompania jonë do ua vlerësojë 30% më shumë dhe ky bitcoin kalon në kuletat e hajdutëve shqiptarë, konvertohet në lekë ose depozitohet në Emiratet e Bashkuara.
Ky është një nga mekanizmat që Rama do t’ia kalojë edhe princit të Emirateve për pasuri. Alabbar është i pasur, por Rama në këtë mënyre do bëhet më i pasur se Alabbar”, theksoi Berisha.
