Në 6 vitet e fundit, që nga momenti që nisi kanabizimi i vendit shumë të rinj janë zhdukur pa gjurmë nga jugu në veri të vendit. Qyteti më i prekur nga ky fenomen është Vlora. E ndërsa disa janë gjetur të vdekur, gjashtë qytetarë vlonjatë janë ende në kërkim dhe familja shpreson se mund të jenë gjallë. Mes emrave të bujshëm që rezultojnë të zhdukur janë Albano Xhaferri dhe Elvis Troqe.
Ky i fundit rezulton i zhdukur pas zhdukjes së Albano Xhaferit, i njohur me pseudonimin “Cëqe”. Albano dhe Ervisi kanë qenë bashkë në Belgjikë dhe pak ditë pasi janë kthyer filloi zhdukja e tyre. Gazment Merkaj deklaroi asokohe se Xhaferi ishte vrarë me urdhër të Edison Harizajt për shkak se ka pasur dijeni për autorët e tentativës së vrasjes së Ferdinant Llanajt në muajin tetor të vitit 2017. Por kufoma e tij ende nuk është gjetur.
Ksandro Imeraj është një tjetër emër i zhdukur në mënyrë misterioze. Kontrollet ishin të shumta në tokë dhe det, por nuk u gjet asnjë gjurmë. Marjo Metushaj është zhdukur më 16 qershor 2017. Ai i tha familjes e do të ikte në Fier ku do të takonte një shokun e tij pasi kishte punë deri në Seman, por më pas u zhduk pa “nam dhe nishan”.
I ekstraduar nga Kanadaja në vitin 2008, pasi ishte i dënuar për akuzën e vjedhjes me dhunë, Leonard Mehmeti, babai i tre fëmijëve është zhdukur mesditën e 22 nëntorit të vitit 2016. Leonardi, i njohur me emrin Nani, kishte ngritur bizneset e tij.
Një restorant në zonën e “lungomares” dhe një fermë kuajsh në Panaja të Vlorës, ku dhe është parë në herën e fundit i gjallë. Adriano Jaho, biznesmen dhe pronari i një hoteli në Vlorë dhe ndihmësi i tij Ariseld Maze 28 vjeç, banues në Tiranë në verën e 2017 dolën në det për të provuar një skaf, por nuk u kthyen më.
Lista e të zhdukurve në Vlorë
Leonardo Mehmeti 22 nëntor 2016
Adrian Jaho 3 korrik 2017
Ariseld Maze 3 korrik 2017
Albano Xhaferri 17 korrik 2018
Elvis Troqe 18 korrik 2018
Ksandro Imeraj 1 mars 2018
Mario Metushaj 16 qershor 2018
Ermal Ngucaj 12 tetor 2020
