Kështu shkruan revista javore “Arabian Buisness”, pasi Kuvendi ka miratuar pas mesnate ligjin për transformimin e Durrësit. Vetë sipërmarrësi Mohamed Alabbar ka thënë në intervistë për revistën që publikohet Lindjen e Mesme, se ky do të jetë ndër projektet më të mirë që kompania e tij ka bërë.
“Një histori e pabesueshme në sfondin e atij që do të jetë një destinacion krejt i ri luksoz. Kemi realizuar shumë projekte ndër vite rreth botës, por nuk kam dyshim se pikërisht ky do jetë absolutisht më i miri ndër ta”, është shprehur sipërmarrësi arab Mohamed Alabar.
I njohur si “ Durres Yachts and Marina ”, ai po projektohet si “një nga qytetet e reja më të qëndrueshme, duke përfshirë praktika miqësore me mjedisin, hapësira të gjelbra dhe teknologji inteligjente për të reduktuar ndotjen e ajrit dhe emetimet e CO 2”.
“Është një game-changer, diçka për të cilën ne kemi punuar shumë, në negociata, për një kohë të gjatë. Unë me të vërtetë nuk mendoj se do të gjeni një tjetër që t’i ngjajë”, është shprehur Alabbar.
Zhvillimi do të akomodojë jahte dhe super jahte deri në 120 m, së bashku me hotele, rezidenca private, shëtitore, dyqane, restorante dhe argëtim. Projekti do të përfshijë gjithashtu terminalin e parë të Shqipërisë për linjat ndërkombëtare të lundrimit.
Mbi 80,000 metra katrorë parqe dhe hapësira të hapura, dhe 170 dyqane tregtare, po planifikohen gjithashtu. Durrësi është një nga qytetet më të vjetra të Shqipërisë, i themeluar në vitin 627 pes, shkruan ndër të tjera revista javore “Arabian Buisness.
