Ish-kryeministri Sali Berisha, e ka quajtur një zhvillim dramatik votimin në Kuvend të projektit për Portin e Durrësit. Ligji kaloi në një seancë maratonë mbi 15 orë, por Berisha thotë se deputetët noterizuan me votën e tyre grabitjen e Portit.
“Porti i Durrësit është i rëndësishëm për BE dhe NATO-n. Edi Rama u përpoq të mashtronte NATO-n, duke e përfshirë në projektin e portit të ri. Pra, ka miratuar një akt që shkel çdo ligj të Shqipërisë, Kushtetutën dhe marrëveshjen e MSA”, tha Berisha.
“Ajo që ndodhi mbrëmë në Parlament, ata që e ndoqën, patën rastin të konstatojnë më shumë se çdo gjë tjetër, solidaritetin në krim të pseudo-mazhorancës socialiste. Solidaritet në një krim të paprecedent, që kryhet duke noterizuar me votën e tyre grabitjen e Portit të Durrësit nga Edi Rama dhe klani i tij. Është në detyrimin e medias dhe gjithë politikës të pasqyrojë këtë zhvillim dramatik.
Dy vite më parë, Edi Rama u deklaroi shqiptarëve se Porti i Durrësit do shndërrohet në marinën më të madhe në Mesdhe, dhe porti i ri do ndërtohet në Porto Romano nga kompania “EMAAR”.
Por kjo kompani ka shitur 100% të aksioneve. Po kush i bleu këto? Sot dihet që një pjesë të tyre i ka mbajtur Alabbar dhe 60% të tyre nuk dihet kush i ka marrë. A mundet një kryeministër të fsheh një marrëveshje 4 miliardë dollarë?!”, vijoi ish-kryeministri dhe kryetari i PD.
