Viktor Çervanaku, ish-kryetar i Komunës Frakull e Madhe në Fier, është arrestuar nga Policia pasi dyshohet se është porositësi i ngarkesës me pleh kimik që erdhi nga Kolumbia në Malin e Zi e më pas në Shqipëri. Në sasinë totale prej 600 kg pleh kimik, dyshohet se është tretur 400 kg kokainë.
Po ashtu, në pranga ka rënë dhe djali i Viktor Çervanakut dhe e fejuara e tij, Demilson Çervenaku dhe Enxhi Ferhati, ndërkohë që roli i tyre në këtë veprimtari nuk dihet se cili është.
Policia dhe SPAK janë vënë në kërkim të “ekspertit” kolumbian Zaimir Rodrigez, i cili dyshohet se kishte ardhur në Shqipëri për të bërë ndarjen e kokainës nga plehu kimik. Kjo ngarkesë e madhe ishte porositur nga kompania në pronësi të Zenel Çervanakut, babai i ish-kryekomunarit.
Newsbomb.al ka nxjerr nga regjistri i Qendrës Kombëtare të Biznesit dhe të dhënat e kësaj kompanie, e cila vepron si Person Fizik dhe është në pronësi të Zenel Çervanakut, e hapur më 19 janar 2022.
“Import-eksport dhe tregtim me shumice e pakice te plehrave kimike dhe mallrave te ndryshme ku perfshihen: lule dhe peme dekorative, fidane te ndryshme, fruta dhe perime te fresketa, fruta te thata,fruta ekzotike,mallra ushqimore te fresketa, te paketuara, te perpunuara, ushqim per bime dhe pesticide te ndryshme si dhe import qymyri i perpunuar.”
Kjo është fusha e veprimtarisë së kompanisë së krijuar në emër të babait të Viktor Çervanakut, ish-kryetari i Komunës së Frakullës. Sasia e kokainës nuk është ende e qartë pasi ngarkesa është marrë nga kamionët e Policisë dhe pritet t’i nënshtrohet analizave dhe eksperimenteve kimike për ndarjen e drogës nga plehu kimik. Sipas mediave malazeze, bëhet fjalë për 400 kg kokainë të tretur.
Gazetarja raporton se truri i trafikut të drogës nga Kolumbia në Frakull të Fierit është shtetasi Nikolin Gjolena. Sipas saj, ky person është i skeduar më parë për çështje të trafikut të drogës dhe me kërkesë të Prokurorisë Speciale SPAK është prangosur.
Hetimet e para dhe mbërritja e drogës në Portin e Tivarit
Paraprakisht bëhet me dije se në total gjatë këtij operacioni në bashkëpunim me autoritetet në Malin e Zi dhe DEA-n amerikane janë arrestuar 15-18 shtetas, të cilët kanë pasur role të ndryshme në këtë organizatë kriminale. SPAK ka lajmëruar në orën 11.00 të kësaj të premteje një konferencë për mediat.
Sasia e drogës dyshohet se ka ardhur pesë muaj më parë në Portin e Tivarit në Malin e Zi, në korrik 2022, nga Kolumbia, dhe më pas është transportuar drejt Shqipërisë. Ngarkesa është nisur drejt vendit tonë, e futur në 600 kg thasë me pleh kimik, dhe menjëherë autoritetet kanë nisur hetimet duke u koordinuar me homologët shqiptarë të SPAK.
Është pritur për pesë muaj dhe ngarkesa e drogës është mbajtur nën vëzhgim, derisa aty të mbërrinte porositësi i kokainës. Menjëherë sapo ky person, emri i të cilit nuk bëhet me dije, ka mbërritur pranë vendit që mbahej nën vëzhgim me urdhër të Prokurorisë Speciale, është ndërhyrë dhe ai është arrestuar në kushtet e flagrancës.
