Partia e Lirisë thotë se Aeroporti i Vlorës është ndërtuar për rreht një vit, ndonëse nuk ka patur leje ndërtimi për kryerjen e punimeve.
Përmes një denoncimi nga selia e PL, sekretari i përgjithshëm Tedi Blushi ka thënë se leja e ndërtimit është dhënë në datën 9 nëntor të këtij viti, ndonëse punimet kanë nisur prej datës 28 nëntor të vitit të kaluar, kur u inagurua nga kryeministri Edi Rama.
Partia e Lirisë kërkoi nga SPAK të nisë hetimet nga kryeministri, deri te punonjësi më i thjeshtë i IKMT-së.
Denoncimi i Blushit:
Edi Rama është kapur në flagrancë në një tjetër akt shumë të rëndë paligjshmërie.
Një vit pas nisjes së punimeve për ndërtimin e Aeroportit të Vlorës, zbulohet se Këshilli Kombëtar i Territorit ka miratuar vetëm në mbledhjen e datës 9 nëntor 2022, dhënien e lejes së ndërtimit.
Pra nga data 28 nëntor 2021, kur Edi Rama inaguroi nisjen e punimeve, dhe derimë tani rezulton e provuar se projekti në terren ka avancuar në shkelje flagrante të ligjit.
Skandali shumë i rëndë, provon hapur se për këtë rast, si edhe në shumë çështje të tjera të denoncuara më herët, shteti dhe prokuroria janë vënë plotësisht në shërbim të “Rilindjes” duke mbyllur sytë, pranuar dhe mos reaguar për nisjen e punimeve të Aeroportit të Vlorës në mungesë të lejes së ndërtimit, sikundër është vepruar edhe me katet, pallatet dhe kullat pa leje në zemër të Tiranës.
Ndërkohë që Edi Rama arreston 82-vjeçaren në Vlorë për ndërtimin e një koteci pa leje, dënon me kërkesë të tij artistët Bojken Lako dhe Mimoza Ahmeti për riparime banese, dhe ndëshkon pa mëshirë me burgim dhe gjoba qindra qytetarë të tjerë në hall për riparime çatie dhe dritaresh, konsumon me ndërgjegje të plotë, së bashku me zyrtarë të tjerë përgjegjës, duke nisur nga Inspektoriati Kombëtar i Mbrojtjes së Territorit, një vepër penale të dënueshme ligjshërisht.
I bëjmë thirrje SPAK të reagojë urgjentisht për rastin dhe të nisë menjëherë hetimet për çdo zyrtar shtetëror, nga Edi Rama dhe deri tek inspektori më i thjeshtë i IKMT, që ka urdhëruar, nxitur dhe mbrojtur nisjen e punimeve për ndërtimin pa leje të Aeroportit të Vlorës.
Dokumenti i publikuar nga PL, ku pretendohet se leja e ndërtimit është dhënë në nëntor të 2022
