Drejtuesi politikë i Partisë Socialiste për Qarkun e Fierit, Taulant Balla dhe drejtuesit më të lartë të Policisë së Qarkut, ndodhen aktualisht në Spitalin e Lushnjës, ku ndodhet kryebashkiaku Fredi Kokoneshi dhe shoferi i tij. Të dy këta persona u plagosën me thikë.
Kreu i Policisë së Fierit ka qenë dhe vetë në vendngjarje, para Bashkisë së Divjakës ku ka ndodhur plagosja. Menjëherë shërbimet nën varësi të tij kanë organizuar punën dhe kanë prangosur në kohë rekord autorin, Orges Xhelili.
“Të dy janë nënshtruar ndërhyrje kirurgjikale shpresoj që çdo gjë të shkojë mirë për të dy. Është një ngjarje e rëndë. Është produkt i kësaj ndasie dhe përçartje që ndodh çdo ditë. Shpresoj që çdo qytetar shqiptar ta kuptoj që në këto ditë të vështira luftë të jemi të bashkuar dhe jo të përçare.
Ju mediat keni një huq shumë të keq! Dhe kur ka fatkeqësi ju e çoni gjuhën mbrapsht. Lëreni policinë dhe drejtësinë të bëjë punën e vet. Dy persona luftojë për jetën. Nuk e di se kush është arsyeja di që një i çmendur ka marrë thikën dhe ka shkuar të godasë! Burimi i kësaj ndasie dhe urrejtje duhet të ndalet”, tha Balla për mediat nga spitali. Krah tij ishte dhe kryebashkiaku i Fierit, Armando Subashi.
Autori, Orges Xhelili ka qenë punonjës i Bashkisë së Divjakës. Dyshohet se për shkak të ndërprerjes së marrëdhënies së punës, ky shtetas ka debatuar me kryebashkiakun Fredi Kokoneshi dhe e ka qëlluar me thikë. Menjëherë ka ndërhyrë dhe shoferi, Gazmend Bullari, i cili po ashtu ka plagë të shumta të shkaktuara nga goditjet me thikë.
