Kryeministri Edi Rama është shprehur mbrëmjen e sotme, në mbyllje të mbledhjes me të deleguarit e rretheve, se qeveria e drejtuar prej tij nuk do të humbë asnjë minutë kohë. Madje, Rama paralajmëroi se PD nuk i ka ndërprerë lidhjet me financimet ruse pesë vite më parë.
“Nuk kemi asnjë lloj minute për të humbur me protestën e thirrur prej atyre që kanë marrë gjysmë milioni dollarë për të bërë protesta të kësaj mënyre në të kaluarën. Koha do ta tregojë që likuiditetet e tyre me paratë ruse nuk janë ndërprerë. Do ta shikoni”, u shpreh Rama.
Më tej, kryeministri foli gjatë dhe për akuzat për Portin e Durrësit, duke theksuar se kompania “EMAAR” është ndër më të njohurat në botë dhe ka ndërtuar gjysmën e Dubait. Sipas tij, transformimi i Durrësit do t’i japë një impakt të madh turizmit.
Pjesë nga deklarata e Edi Ramës, dhënë nga selia e PS:
Edi Rama: Unë kam parë shumë gjëra të shëmtuara që janë burim neverie në historinë politike shqiptare. Kjo është nga më të shëmtuarat. Marrja nëpër gojë në mënyrë më të paturpshme të një personaliteti të ekonomisë globale. Një ndër kompanitë e të cilit është e regjistruar në Abu Dhabi. Ka selinë në kullën më të lartë të Abu Dhabit. Një personalitet që ka ndërtuar gjysmën e Dubait.
Vjen këtu jo se nuk ka punë dhe s’ka ku të shkojë tjetër. Vjen këtu në kuadër të një marrëveshje në një kohë të vështirë, kur unë shkova për familjet e prekura nga tërmeti në Durrës.
Ne nuk kemi miratuar asgjë. Ne kemi futur për diskutim me procedurë të përshpejtuar një marrëveshje strategjike. Është e mirë për ty, për familjen tënde, për ju që jeni brez më i ri (u drejtohet gazetarëve). Sjell një investim prej 2 miliardësh.
Transformon përgjithmonë imazhin dhe industrinë tonë kryesore që është turizimi. Si mundet, ndërkohë që të gjitha këto pyetje, çfarë do përfitojë Durrësi, çfarë do përfitojnë ata, ka kaq kohë që negociojmë. Është një investim ku shteti shqiptar nuk ka dhënë, por ka marrë njëkohësisht 33% të aksioneve.
Këto muhabete pazari te gabi, jo kjo po ajo, unë nuk jam këtu për këto. Këto janë diskutime që do të bëhen dhe ju do t’i dëgjoni. Ngritja e këtyre akuzave dhe derdhja e këtij llumi, është një turp i madh.
A e konsideron Partia Socialiste mundësinë e një koalicioni?
Edi Rama: Po, me qytetarët.
Dy deputetët e PD kanë qenë të dehur?
Edi Rama: Unë nuk kam njohur deri tani asnjë të dehur që të thotë jam i dehur. Ata janë bedelë. Në kuptimin e plotë të kësaj fjale. Hapni fjalorin dhe shikoni çfarë është bedel. Pse paratë ruse u derdhën paratë ruse për të rrëzuar qeverinë e këtij vendi?!
Protesta e 12 Nëntorit?
Edi Rama: Nuk kemi asnjë lloj minute për të humbur me protestën e thirrur prej atyre që kanë marrë gjysmë milioni dollarë për të bërë protesta të kësaj mënyre në të kaluarën. Koha do ta tregojë që likuiditetet e tyre me paratë ruse nuk janë ndërprerë. Do ta shikoni.
Sa bashki synon Partia Socialiste?
Edi Rama: Të gjitha.
