Kur shpërthyen protestat në fund të muajit shkurt dhe fillim të muajit mars pas abuzimit të oligarkëve me rritjen e çmimit të naftës, Edi Rama njoftoi se do të ngrinte një bord transparence, që do të mbronte interesin publik.
Bordi u ngrit përmes një akti normativ të miratuar në një mbledhje qeverie të mbajtur më 12 mars. Akti përcakton se shtatë anëtarë të bordit i takojnë qeverisë dhe pesë të tjerë tregtarëve të naftës, ku tre do të ishin të tregtarëve të shumicës dhe dy të atyre me pakicë.
Problemi është se në Shqipëri tregu është deformuar prej kohësh dhe si tregu me pakicë, ashtu edhe ai i shumicës kontrollohen nga të njëjtat duar.
Ky nuk është problemi i vetëm dhe as më madhori. Më madhori është që e gjithë vendimmarrja e bordit në këto muaj mund të ketë mbrojtur gjithçka, përveçse interesit publik. Shqipëria sot është me çmimin e naftës më të lartë në rajon dhe ndër më të lartët në botë.
Por, kush flet në emër të qytetarëve brenda këtij bordi? Sipas aktit normativ, qeveria përfaqësohet në këtë bord me ministren e Financave, ministren e Infrastrukturës dhe Energjisë, drejtorin e Tatimeve dhe drejtorin e Doganave.
Veç këtyre katër, janë edhe tre emra të tjerë në nivel drejtorësh të lartë, dy nga infrastruktura dhe energjia dhe një nga financat.
Për t’i marrë me radhë, interesin e qytetarëve e mbron Delina Ibrahimaj, që është njëkohësisht edhe kryetare e bordit.
Anëtare është ministrja Belinda Balluku. Më pas janë drejtori i Tatimeve, Ceno Klosi dhe ai i doganave, Gent Gazheli.
Në rangun e drejtorëve të lartë, Niko Lera është përzgjedhur nga Ministria e Financave dhe Ilia Gjermani e Enea Karakaçi nga ministria e Infrastrukturës dhe Energjisë.
Këta janë shtatë anëtarët e bordit të çmimeve që vendosin se sa do të paguajnë qytetarët naftën dhe të ngritur me qëllim mbrojtjen e interesit publik përballë krizës së çmimeve. Sa ja kanë dalë mbanë? Përgjigja është retorike në këtë rast.
Shqipëria, prej ngritjes së këtij bordi ka regjistruar nivelet më të larta të çmimit të naftës jo vetëm në rajon, por edhe në Europë dhe botë. çmimet nuk janë ulur as kur nafta është ulur në tregjet ndërkombëtare. Si shembull, në rastin e fundit bordi qëndroi gati tre javë pa u mbledhur për të reflektuar uljen e naftës në bursa dhe kur u mblodh vendosi ta ulte atë nga dy herë me 4 lek.
Por, kur në tregjet e huaja çmimi rritet, bordi mblidhet me shpejtësinë e dritës dhe jo vetëm që e rrit, por e bën atë edhe mbi nivelin e rritjes së çmimit në bursat ndërkombëtare. Si shembull, në fillim të tetorit, nafta u rrit në bursën Platz, që bordi thotë se i referohet për të vendosur çmimet, me 5 për qind. Bordi në Shqipëri vendosi ta rrisë çmimin brenda ditë me 20 lek, ose gati 10 për qind e litrit të naftës.
Këto janë arsyet se përse shtatë përfaqësuesit e qeverisë në këtë bord më shumë janë bërë palë me përfaqësuesit e oligarkëve të karburanteve se sa me qytetarët, që nëse bordi nuk ekzistonte me shumë mundësi do ta blinin një litër naftë më lirë se sot.
©Copyright Vox News
