Ish kryetari i Bashkisë së Kavajës, Isa Sakja, është kandidati i parë i cili ka shpallur zyrtarisht kandidaturën për primaret në Kavajë për të garuar më pas për Bashkinë e këtij qyteti.
Ka qenë vetë Sakja i cili përmes një njoftimi në rrjetet sociale ka bërë me dije se pas konsultimeve me mbështëtësit ka vendosur që të shpallë kandidaturën për postin e Kryetarit të Bashkisë Kavajë.
I bindur për të rikthyer demokracinë në pushtetin lokal, Sakja thekson se askush nuk mund ta durojë më këtë babëzi të qeveritarëve për të marrë gjithçka dhe se beteja e tij fillon ditën e sotme dhe do të përfundojë më 14 maj me fitore.
“Të dashur qytetarë të Bashkisë së madhe Kavajë,
Pas konsultimeve e takimeve me Ju, që më mbështesni e më frymëzoni, vendosa të shpall kandidaturën time për postin e Kryetarit të Bashkisë Kavajë.
“Të ecim përpara e me guxim drejt fitores sonë të pandalshme!”
Askush nga ne nuk mund ta durojë më këtë bllokim të demokracisë si të ngecur në një trafik që nuk lëviz më nga kapaciteti i ulët qeverisës, nga babëzia e madhe e qeveritarëve për të marrë gjithçka për vehten dhe një grup të vogël oligarkësh që i rrethon.
Zgjedhjet konkuruese prodhojne demokraci.
E gjithë jeta është përpjekje për të realizuar një qëllim, e vetmja zgjedhje që ne mund të bëjmë është të zgjedhim qëllimin e drejtë.
Në 14 maj 2023 ne, populli i Kavajës e kemi zgjedhur qëllimin tonë: ne do të rikthejmë demokracinë në pushtetin lokal.
Ne do të rivendosim marrëdhënien e drejtë me çdo qytetar e grup interesi e do t’i marrin vendimet vetëm nëpërmjet konsultimit të gjerë me qytetarët dhe në interesin e tyre publik.
Të guxosh të konkurosh për t’ju përfaqësuar Ju , interesat tuaja, shpirtin tuaj demokratik është për mua një detyrim dhe një mision njëkohësisht i cili nis sot dhe do të përfundojë me 14 maj me fitoren tuaj të Bashkisë Kavajë.
Ne kemi guximin, kemi energjinë pozitive, kemi dashurinë për qytetin, kemi eksperiencën ndaj do të kemi edhe FITOREN!
Skuadra jonë e madhe; bashkimi i gjithe qytetareve te Kavajes, motra e vëllezër në shpirt si dhe besa që i kemi dhënë historisë e njëri- tjetrit për çuarjen përpara të vlerave të demokracisë dhe ripërtëritjen e qytetit nuk mund të njohë tjetër, veçse FITORE!
Ajo i do guximtarët!
”, shkruan Sakja.
Isa Sakja ka qenë kryetari i Bashkisë së Kavajës. Ai mori mandatin më 2017 dhe e mbajti këtë post për dy vite. Sakja fitoi me vetëm 28 vota më shumë se kandidati socialist, Dorian Murati.
