Detaje të reja janë zbardhur nga ngjarja e rëndë që u shënua mbrëmjen e djeshme në kryeqytet në zonën e Kodrës së Diellit, ku mbeti i vrarë pas një atentati Briken Sanaj.
Bëhet me dije se 39-vjeçari Briken Sanaj është qëlluar me 3 plumba dhe se dy prej tyre kishin kapur në fytyrë.
Autorët kanë hapur pak xhamin e pasëm të mjetit e më pas kanë qëlluar Sanajn, i cili humbi jetën rrugës për në spitalë nga plagët e marra.
Mirëpo duket se atentati ka qenë i mirëorganizuar dhe se autorët janë kujdesur që mos të lënë asnjë gjurmë në vendin e ngjarjes. Grupi hetimor mësohet se ka arritur që të gjejë vetëm një gëzhojë në vendin e ngjarjes dhe asgjë tjetër, por janë sekuestruar edhe kamerat sigurisë që ndodhen në atë zonë për të bërë të mundur identifikimin e autorëve.
39-vjeçari është babai i dy fëmijëve dhe se ka jetuar në Itali, nuk dihen ende se çfarë ka çuar në këtë ngjarje të rëndë.
Pak pas atentatit, policia gjeti një makinë që ishte djegur në Qafë Kashar, në afërsi të një biznesi pllakash. Mjet që ishte i vjedhur. Skenë kjo që përsëritet në çdo atentat, autorit vrasin, largohen dhe djegin mjetin për të zhdukur gjurmët.
Grupi hetimor po punon për sqarimin e plotë të rrethanave të ngjarjes dhe për fiksimin e çdo prove të vlefshme që mund të çojë në identifikimin e autorëve.
