Kryetari i PD-së, Sali Berisha, i ka bërë thirrje sot të gjithë shqiptarëve për të marrë pjesë në protestën kombëtare të pedagogëve, që do të mbahet të hënën në orën 11:00 përpara Korpusit Qendror të Universitetit Politeknik të Tiranës.
Berisha shkruan në Fb, krahas postimit të njoftimit: “Vazhdon, i pamposhtur, bojkoti dhe protesta kombëtare e universiteteve. Të gjithë në protestë!”
Në shpalljen e Sindikatës së Punonjësve të Universiteteve të Shqipërisë, protesta dhe bojkoti së bashku konsiderohen si Lëvizje Universitare që ka moto “Arsimi i Lartë Publik, prioritet kombëtar”.
Kjo sindikatë u kërkon pedagogëve, akademikëve, studentëve, shoqërisë civile, aktivistëve, përfaqësuesve të institucioneve publike që lidhen me arsimin dhe shkencën, për bojkot dhe protestë kombëtare universitare të hënën më 31 tetor 2022, ora 11:00 përpara UPT-së.
“Misioni akademik vazhdon”, thuhet në fund të shpalljes.
Kujtojmë se kryetari i Sindikatës, Aleksandër Koçaçi, paralajmëroi përshkallëzim të protestës deri nn grevë urie, në rast e qeveria nuk do të vihej në lëvizje për të plotësuar kërkesat e pedagogëve.
