Të shtëna me armë zjarri raportohen në këto momente në Tiranë, në zonën e Kodrës së Diellit. Deri tani, bëhet fjalë se një person ka mbetur i plagosur, ndërsa autori është larguar menjëherë por është identifikuar nga Policia.
Ka qenë një konflikt mes komshinjve i cili ka degjeneruar deri në përdorimin e armës. Kjo zonë njihet si ndër më të shtrenjtat në kryeqytet dhe ku banojnë një numër i madh politikanësh e biznesmenësh.
Referuar njoftimit të Policisë së Tiranës, bëhet me dije se 35 vjeçari i plagosur, ndodhet në Spitalin e Traumës jashtë rrezikut për jetën. Ndërkohë, autori i dyshuar Olsi Bllaci është shpallur në kërkim dhe po punohet për kapjen e tij.
Tiranë/Informacion paraprak
Plagosi me armë zjarri fqinjin e tij, identifikohet e shpallet në kërkim autori.
Më datë 27.10.2022, rreth orës 21:50, është paraqitur në Spitalin e Traumës për ndihmë mjekësore, shtetasi J. Sh., 35 vjeç, i plagosur me armë zjarri.
Me marrjen e njoftimit, shërbimet e Komisariatit të Policisë Nr. 1, kanë shkuar në vendngjarje, te Kodra e Diellit, dhe kanë bërë të mundur identifikimin dhe shpalljen në kërkim të autorit të dyshuar shtetasit O. B.
Nga hetimet paraprake dyshohet se shtetasi O. B., pas një konflikti ka plagosur me armë zjarri shtetasin J. Sh. Grupi hetimor po punon për sqarimin e rrethanave të ngjarjes. Vijon kontrolli i zonës për kapjen e autorit të dyshuar të ngjarjes.
