Presidenti i Rusisë, Vladimir Putin pretendon se konflikti në Ukrainë mund të përshkallëzohet në nivel botëror.
“Ukraina është bërë instrument i politikës së jashtme të SHBA-së dhe praktikisht e ka humbur sovranitetin e saj. Rreziku për një konflikt në botë në tërësi, si dhe në nivel rajonal, mbetet shumë i lartë. Rreziqe dhe sfida të reja për sigurinë kolektive po shfaqen, kryesisht si shkak i përkeqësimit të përballjes gjeopolitike globale”, u shpreh Putin.
Për NATO-n nga ana tjetër Putin po humbet terren dhe po përgjigjet me sulme ndaj civilëve dhe me retorikë bërthamore.
11 civilë kanë humbur jetën dhe 14 të tjerë kanë mbetur të plagosur në Ukrainë gjatë 24 orëve të fundit për shkak të sulmeve ruse. Kështu është shprehur në Telegram, nënkryetari i Zyrës së Presidentit, Kyrylo Tymoshenko.
Sipas të dhënave nga administrata ushtarake rajonale e vendit, dy civilë u vranë dhe katër të tjerë mbetën të plagosur në rajonin e Dnipropetrovsk në Ukrainën Jugore. Pesë persona të tjerë vdiqën dhe katër të tjerë u plagosën në rajonin e Donetsk. Dy civilë vdiqën dhe dy të tjerë u plagosën në Zaporizhia, dhe një tjetër u plagos nga një shpërthim mine në rajonin e Kharkiv.
