Sabri Hoxha, ekspert i njohur mjeko-ligjor, thotë se autopsia që i është bërë trupit të Lear Kurtit 5 orë nga vdekja e tij, është në shkelje të plotë të ligjit. Sipas tij, një qese me kokainë me përmasa 5×5 cm është e pamundur të gëlltitet nëse je dhe duke vrapuar, siç është deklaruar për Lear Kurtin.
“Autopsia duhet të bëhet në 12 orë. Në momente të tilla kur ka përplasje institucionale, duhen mbi 12 orë, sepse ekspertëve u duhet kohë të shihet ndryshimet që pësojë indet… Autopsia e bërë brenda 5 orëve ka qenë në shkelje të plotë të ligjit.
Si është marrë kjo qese? Se një qese 5.5 cm është shumë e vështirë, e pamundur për ta gëlltitur. Nëse viktima e ka marrë këtë qese, e ka gëlltitur, kur ka qenë duke vrapuar, është e pamundur që të hapet nëse je duke vrapuar”, është shprehur Hoxha.
I ftuar në emisionin “Log” me Endri Xhafon, eksperti mjeko-ligjor komentoi dhe foton e Lear Kurtit. Sabri Hoxha tregoi se një nga shenjat që ka 32 vjeçari në zonën e veshkave, në anën e majtë të trupit, është krijuar nga një forcë e madhe.
“Ajo është shembje e indeve. Për ta krijuar atë duhet një forcë e madhe. Ajo është shkaktuar si rezultat i ushtrimit të një force. Ajo nuk ngelet vetëm te lëkura, po del dhe të organet e brendshme, siç është veshka”, u shpreh eksperti mjeko-ligjor.
