Kanë dalë pamjet të reja mbi vdekjen e 32-vjeçarit Lear Kurtit, i cili humbi jetën mbrëmjen e së mërkurës, më 19 tetor dhe hapi debat mbi mënyrën e sjelljes nga ana e efektivëve të Policisë.
Më konkretisht, itinerari i tij, nga momenti i bërjes me shenje nga ana e Patrullës së Policisë për të ndaluar, deri në momentin kur bie pa ndjenja dhe media publikoi më herët pamjet ekskluzive se si efektivët tentonin ta ngrinin me forcë edhe pse ai ishte në gjendje të rëndë shëndetësore.
Siç shihet në pamje e siguruara nga emisioni “Review” në Euronews Albania, policia ka qenë duke patrulluar në rrugë, ndërkohë më pas shfaqet Kurti, i cili po kalonte në rrugë me telefon në dorë, që siç duket po fliste me dikë. Më pas shihet momenti kur dy policë njëri pas tjetrin fillojnë e ndjekin me vrap 32-vjeçarin. Ata e kanë ndjekur për 200 metra, deri në momentin që e kanë neutralizuar në rrugën e ‘Don Boskos’.
Ndërkohë më vonë, Vox News.al publikoi pamjet ekskluzive ku i riu është në gjendje të rëndë shëndetësore dhe pa ndjenja, teksa efektivi i Policisë mundohet ta ngrejnë me forcë.
Në atë gjendje që ndodhej Lear Kurti, uniformat blu nuk duhet ta kishin prekur fare me dorë dhe aq më keq t’i kishin vendosur prangat apo edhe ta shoqëronin në komisariat siç vepruan tre efektivë në videon e mëposhtme.
Ata duhet të njoftonin ambulancë dhe të prisnin bluzat e bardha në vendin e ngjarjes deri në momentin kur të vinin për t’i dhënë ndihmën e parë mjekësor.
Spitali i Traumës përgënjeshtroi policinë, teksa tha se Kurti kishte mbërritur i vdekur aty. Policia jo vetëm që nuk lajmëroi ambulancën, por e mori të riun dhe e çoi në komisariat dhe më pas e çuan të vdekur në spital.
Për gjatë gjithë kësaj kohe, nëse efektivët do kishin vepruar siç duhet, ndoshta mjekët do kishin vepruar në momentin e duhur dhe sot Lear Kurti do ishte gjallë.
Përmes një njoftimi, Agjencia e Mbikëqyrjes Policore tha se mbrëmjen e 19 tetorit, gjatë patrullimit në Rr. “Riza Çuka” në zonën e Laprakës, efektivët kanë konstatuar Laert Kurtin duke qëndruar përpara një biznesi privat, për të cilin kushtet dhe rrethanat diktonin nevojën e një verifikimi.
Në momentin kur punonjësit e Policisë, i kanë kërkuar dokumentin e identifikimit, Kurti është larguar me vrap, duke mos iu bindur thirrjeve të njëpasnjëshme të punonjësve të Policisë për të ndaluar.
Pasi ka vrapuar për rreth 200 metra, i ndjekur nga patrulla e Policisë, mes rrugicave midis rrugës “Riza Çuka” dhe “Don Bosko”, ai është kapur dhe ndaluar nga punonjësit e Policisë, vend në të cilin kanë qëndruar 7 minuta.
I riu u shoqërua në komisariat dhe hetimi paraprak del në përfundimin se ai humbi jetën për shkak se ka gëlltitur një qese me drogë, për t’iu shmangur kapjes nga policia.
