Ambasadori italian në Londër, Inigo Lambertini, i ka shkruar një letër redaktorit të The Economist pasi e përjavshmja publikoi një kopertinë ku paraqitej Liz Truss, kryeministrja që dha dorëheqjen dje, e veshur si një ushtar romak me një shtizë që është një pirun spageti dhe një mburojë e cila në fakt është një pica.
Titulli është “Welcome to Britaly”, me një aludim të qartë për kushtet “italiane” në të cilat ndodhet politika britanike.
Në letrën e tij, të publikuar në llogarinë zyrtare të Ambasadës italiane në Mbretërinë e Bashkuar, Lambertini shkruan se “leximi i Economist është kënaqësi për çdo diplomat. Dhe për ambasadorin italian në Mbretërinë e Bashkuar, aq më tepër duke pasur parasysh që ju i kushtoni vëmendje të vazhdueshme Italisë, një vend kaq të dashur nga populli britanik.”
Lambertini më pas del në temë dhe i referohet kopertinës “për fat të keq të frymëzuar nga stereotipet më të lashta. Megjithëse spageti dhe pica janë pjatat më të kërkuara në botë, duke qenë Italia fuqia e dytë prodhuese në Evropë, për kopertinën tuaj të radhës ju sugjerojmë të zgjidhni diçka që lidhet me hapësirën tonë ajrore, bioteknologjinë, automobilistikën apo atë farmaceutike. Çfarëdo që të zgjidhni, do të japë një pamje më të saktë të Italisë, duke marrë parasysh edhe admirimin tuaj, jo aq të fshehtë, për modelin tonë ekonomik.”
Inigo Lambertini ka vetëm dy javë në Londër, por ka punuar në delegacionin italian në Këshillin e Sigurimit të Kombeve të Bashkuara dhe në përfaqësinë italiane në OECD në Paris. Më parë ka punuar në ambasadat italiane në Uashington, Brazil dhe Republikën Demokratike të Kongos.
Ambasadori ndërthur taktin dhe qartësinë diplomatike në mesazhin drejtuar “miqve tanë të dashur të Economist” dhe mban qëndrim. Ai përmend katër sektorë industrialë në të cilët teknologjia italiane dhe zgjuarsia sipërmarrëse janë qartësisht konkurruese dhe të afta për t’u paraqitur si protagonistë në tregun britanik.
