Komisioni i Ligjeve është shoqëruar me debate mes përfaqësuesve të partive politike, ku protagonistë u bënë Pandeli Majko me Enkelejd Alibeaj. Majko iu drejtua ashpër deputetit Alibeaj, duke i thënë se po diskuton si të ishte “adoleshent”.
“Ligji vetë ka probleme, ju bëtë një propozim të pashkruara. Shikoni se kur është krijuar sigurimi i shtetit dhe vendosini datat. Pas 30 vjetësh këto janë budallallëqe. Të na thoni ne se “ju nuk doni të hapni këtë ose atë”, nuk ka kuptim. Në dosje mund të këtë detaje se edhe viktima nuk është i interesuar.Ik ore, se vjen këtu e na diskuton si adoleshent”, tha Majko.
Alibeaj tha se duhet të shkallmohet dera, e cila mban të “pluhurosura” dosjet e ish-sigurimit të Shtetit.
“Të shkallmohet dera, që mban të mbyllura dosjet e sigurimit. Dosjet të hapen pa asnjë kufizim, pra vetëm me kufizimin që të mos cenohet siguria kombëtare. Ajo që po pretendojmë ne është shumë herë më tepër, jo vetëm të kontrollohet, por të mos kontrollohet nga një dorë e vetme”, theksoi ai.
