Dy anëtarë të Shërbimeve Sekrete Ruse kanë mbërritur mbrëmjen e djeshme me avion në Francë dhe kanë kërkuar azil. Ata pretendojnë se kanë dokumente “shumë të rëndësishme” për pushtimin e Ukrainës.
Ata janë një anëtar i Shërbimit Sekret Rus (FSB) dhe një anëtar i organizatës mercenare Wagner, sipas gazetës së pavarur ruse “The Insider”.
Dy burrat mbërritën me të njëjtin avion në Francë dhe thuhet se do të dëshmojnë si pjesë e hetimit për krimet e luftës ruse në Ukrainë. Aktivisti rus i të drejtave të njeriut Vladimir Usyskin, tha se të dy agjentët do të dëshmonin gjithashtu për korrupsionin brenda FSB dhe Wagner.
Oficeri i FSB-së, sipas të njëjtave burime, ka informacione të brendshme shumë të rëndësishme për dokumentet që lidhen si me pushtimin e Ukrainës, ashtu edhe me zhvillimet e fundit në departamentin e kundërzbulimit dhe Ministrinë ruse të Mbrojtjes.
Sipas Usyskin, në muajt e fundit edhe zyrtarë të tjerë arritën të largoheshin nga Rusia dhe të kërkonin azil.
