Rusia ka treguar se mund të jetë e hapur për një takim midis Presidentit Joe Biden dhe Presidentit Vladimir Putin, tha Ministri i Jashtëm rus Sergey Lavrov në një intervistë për agjencinë e lajmeve Interfax.
“Ne kemi thënë vazhdimisht se nuk i refuzojmë kurrë takimet”, është shprehur kreu i diplomacisë ruse, “Nëse bëhet një propozim, do të shqyrtohet nga ne.”
Ndërkohë, gati një javë më parë Këshilli i Sigurisë Kombëtare i SHBA vuri në dukje një koment të bërë nga Biden jashtë Shtëpisë së Bardhë. Kur u pyet nga një gazetar nëse ai do të takohej me liderin rus, presidenti amerikan u përgjigj: “Kjo mbetet për t’u parë”.
Sipas ekspertëve, gatishmëria e Rusisë për bisedime pas më shumë se 7 muajsh luftë në Ukrainë, është një sinjal që tregon sesa e vuan Kremlini izolimin ndërkombëtar.
Teksa reagimet për një takim të mundshëm shtohen, presidenti amerikan ka ndarë një foto në llogarinë e tij në Twitter duke ju përgjigjur me “elegancë” këtyre zërave. Ai ka publikuar një foto me qenin e tij në zyrë dhe shkruan “shoqëruesi më i mirë i takimeve”.
