Një operacion i madh është zhvilluar nga Policia në Krujë, për goditjen e një rrjeti që merrej me kultivimin e bimëve narkotike. Pesë shtetas janë arrestuar dhe dy të tjerë janë shpallur në kërkim, ndërsa janë sekuestruar miliona lekë, drogë e gatshme dhe mbi 1,300 rrënjë kanabis.
“Shërbimet e Komisariatit të Policisë Krujë, pas një pune të mirëfilltë hetimore disamujore, në bashkëpunim me Prokurorinë pranë Gjykatës së Rrethit Gjuqësor Krujë, kanë organizuar dhe finalizuar megaoperacioni policor antikanabis të koduar “Survey”, si rezultat i të cilit u vunë në pranga shtetasit:
- Artan Elezaj, 35 vjeç, Ahmet Elezaj, 41 vjeç ( vëllezër), Sokol Xaka, 24 vjeç, G. Ll., 36 vjeç dhe Përparim Kasa, 47 vjeç. Gjithashtu, u shpallën në kërkim shtetasit Muharrem Xaka, 26 vjeç (vëllai i shtetasit të arrestuar Sokol Xaka) dhe Bilal Afmeti, 37 vjeç.
Nga hetimet rezultoi se këta shtetas, në bashkëpunim me njëri-tjetrin, kanë kultivuar në kohë dhe në ambiente të hapura të ndryshme, 1353 bimë narkotike, në zona të pyllëzuara të fshatit Bruz Mal, të cilat janë evidentuar dhe asgjësuar përgjatë periudhës hetimore. Në vijim të kontrolleve në kuadër të operacionit “Survey”, në banesën e shtetasit të arrestuar G. Ll., u gjetën dhe u sekuestruan 5.3 kg lëndë e dyshuar narkotike kanabis e gatshme për shitje.
Gjithashtu, u sekuestruan në cilësinë e provës materiale 2,450,000 lekë, 4,000 euro, 9 aparate celulare, 4 automjete dhe 1 armë gjahu, të dyshuara të përfituara apo të përdorura për kryerjen e kësaj veprimtarie kriminale”, njofton Policia e Shtetit.
Materialet procedurale i kaluan Prokurorisë pranë Gjykatës së Rrethit Gjyqësor Krujë, për veprime të mëtejshme.
