GJKKO sekuestron pronat e Emiljan Shegës, i akuzuar si trafikant droge në Angli! Historia e një të riu shqiptar që ishte 19 vjeç kur…

Bëhet fjalë për Emiljan Shegën dhe një episod të 12 viteve më parë në periferi të Londrës. I riu, bashkë me një grup shqiptarësh dhe disa anglezë, u arrestuan dhe u dënuan me masa të ndryshme, ndërkohë që dy vite më parë OFL-ja i dërgoi një formular deklarimi pasurie të riut dhe ditën e djeshme u bë me dije se Gjykata e Posaçme ia ka konfiskuar pasurinë.

Në një njoftim për mediat që lidhet me sekuestrimin dhe më pas konfiskimin e pasurisë së Shegës, mësohet se është një apartament dhe mijëra metra kullotë që i janë marrë atij dhe njerëzve të tij dhe i kanë kaluar shtetit.

Nuk dihet se çfarë ka ndodhur pas atij arrestimi me të riun prej Shkodre, por një shkrim i 10 viteve më parë në një media britanike hedh dritë mbi atë çfarë ka ndodhur në vitin 2010, kur disa të rinjve shqiptarë iu sekuestrua një sasi lënde narkotike dhe u akuzuan se kishin mundur të pastronin nëpërmjet dy shtetasve britanikë shumën prej 10 milion paundësh, duke i kthyer në euro.

Madje media, së cilës i referohet “Panorama” për historinë e Shegës dhe të grupit të tyre, tregon se kjo shumë në paund u kthyer në Euro për të pasur mundësinë e lëvizjes më lehtë në drejtim të Shqipërisë. Në njoftimin që ka dhënë gjykata për pasurinë e konfiskuar jepen objektet, por nuk tregohen vendet në të cilat gjenden këto pasuri.

KONFISKIMI

Gjykata e Posaçme e Apelit bëhet me dije se ka lënë në fuqi sekuestron e pasurisë për një subjekt të OFLsë. Bëhet fjalë për shtetasin Emiljan Shega, i dënuar në Angli për trafik kokaine.

Konkretisht Emiljan Shegas i është sekuestruar 1 apartament dhe 5 sipërfaqe toke, i cili rezulton i arrestuar dhe i dënuar si pjesë e një grupi kriminal që trafikoi drejt Mbretërisë së Bashkuar lëndë narkotike me vlerë 10 milionë paund. Kjo pasuri do t’i kalojë përfundimisht shtetit dhe mësohet se përbëhet nga 5 pasuri dhe konkretisht: Pasuria e llojit “Apartament”, me sipërfaqe 130 m2 , {…}, në pronësi të shtetasit E.Sh.; pasuria e llojit “Kullotë”, me sipërfaqe 5667 m2 , {…}, në bashkëpronësi të shtetasve E.Sh. dhe E.K.; pasuria e llojit “Kullotë”, me sipërfaqe 3782,6 m2, {…}, në bashkëpronësi të shtetasve E.Sh. dhe E.K.; pasuria e llojit “Kullotë”, me sipërfaqe 498,8 m2 , {…}, në bashkëpronësi të shtetasve E.Sh. dhe R.K.; pasuria e llojit “Kullotë”, me sipërfaqe 17328,3 m2 , {…}, në bashkëpronësi të shtetasve E.Sh. dhe R.K. dhe pasuria e llojit “Kullotë”, me sipërfaqe 7000 m2 , {…}, në bashkëpronësi të shtetasve G.H. dhe M.K.

ARRESTIMI

Referuar “My London”, një gazete britanike që është marrë me shqyrtimin e rastit në kohën kur dosja ishte në gjykatë mësohet se Shega u arrestua aso kohe bashkë me disa persona të tjerë. Bëhej fjalë konkretisht për Xh. G, 31 vjeç, F. B, 23 vjeç dhe Emiljan Shega, 19 vjeç, të lindur në Shqipëri, të gjithë banorë Priory Gardens të Wembleyt, të cilët sipas Prokurorisë u përfshinë në një komplot për të kanalizuar miliona paund përmes një zyre këmbimi, me të cilat më pas të paguanin drogën e klasit A që shpërndanin.

Policia britanike njoftoi aso kohe 8 kg kokainë ishin fshehur nën dërrasat e dyshemesë si dhe u gjetën edhe rreth 100,000 £. Të ardhurat nga shitja e drogës, sipas hetimit u pastruan më pas përmes një zyre këmbimi. Dy persona të tjerë të tjerë, britanikë, u tha se krijuan kompani false dhe u regjistruan në byronë e këmbimit. Më pas, ata i dhanë detaje të rreme Drejtorisë së Ardhurave dhe Doganave. Në atë zyrë këmbimi, sipas dyshimeve u bë edhe pastrimi i 10 milionë paundëve, të cilët u kthyen në euro dhe që një pjesë e mirë e tyre, nuk u gjetën kurrë.

Bashkë me tre shqiptarët dhe dy britanikët, aso kohe u tha se ishin akuzuar arrestuar e hetuar edhe dy shqiptarë të tjerë, njëri prej të cilëve bëri betejë të fortë ligjore në krah të të cilit u vendosën avokatë britanikë. Por, shqiptarët e bashkë me ta Shega, u dënuan me dënime jo të vogla pasi sasia e madhe e lëndës narkotike që sipas policisë qarkullohej prej tyre në zonat më të populluara të Londrës ishte e klasit A, për të cilën edhe dënimet janë më të rënda. Më vonë emri i Emiljan Shegës u paraqit edhe në shkresat e policisë sonë që në 2020-n e vendosi nën verifikim pasurie për ta çuar në Gjykatë vetëm një vite më pas.