Ministrja e Arsimit, Evis Kushi, ka reaguar lidhur me vendimin e marrë ditën e djeshme për mbylljen e Kolegjit “Mehmet Akif”.
Përmes një positmi në “Facebook”, Kushi ka listuar arsyet të cilat çuan në marrjen e këtij vendimi, duke hedhur poshtë spekulimet se vendimi lidhej me kërkesën e bërë nga presidenti turk, Rexhep Erdogan.
Ministrja thekson se shkolla në fjalë nuk ka plotësuar kushtet e vendosura dhe kriteret ligjore.
Ndërkohë, mbrëmjen e djeshme një reagim ka ardhur dhe nga Kolegji “Mehmet Akif”të cilët bënë me dije se njoftimin për mbylljen e gjimnazit dhe kopshtit e morën nga mediat, si dhe këtë çështje do e ndjekin në mënyrë ligjore, pasi sipas tyre kanë plotësuar të gjitha kushtet dhe kriteret e vendosura nga Ministria e Arsimit.
Postimi i plotë i ministres Kushi:
SQARIM PËR OPINIONIN PUBLIK
Nisur nga interesimi dhe spekullimet në lidhje me shkaqet që çuan në heqjen e licencës dhe mbylljen e shkollës jopublike “Mehmet Akif Ersoy”, sqarojmë se ky vendim është rezultat i konstatimit nga Ministria e Arsimit dhe Sportit të një sërë shkeljeve të legjislacionit në fuqi nga zotëruesit e licencës në fjalë.
- Kanë filluar procesin mësimor 2022-2023 në një vendndodhje dhe mjedise të tjera, të pamiratuara nga MAS, pra pa certifikimin ligjor përkatës të standardeve të godinës.
- Nuk i kanë plotësuar më tej kriteret ligjore edhe pse nga ana MAS është kryer dy herë verifikimi i tyre.
- Në kushtet e ushtrimit të veprimtarisë jashtë kritereve përkatëse licenca duhet të revokohet.
Ministria e Arsimit dhe Sportit në çdo rast ka përgjegjësinë për garantimin e standardeve, sigurisë dhe mirëqenies së nxënësve. Prandaj, në respekt të ligjit dhe në mbështetje të 160 nxënësve dhe të familjeve të tyre, do të marrë të gjitha masat e nevojshme për të transferuar nxënësit në shkolla që përmbushin kriteret dhe standardet e funksionimit.
Ndërkohë Ministria e Arsimit dhe Sportit nënvizon se revokimi i licencës në fjalë nuk ka asnjë lidhje me spekullimet e ndryshme rreth shkaqeve të këtij vendimi.
Gjithashtu, Ministria e Arsimit dhe Sportit sqaron të gjithë të interesuarit për këtë çështje, se në këtë fillimviti shkollor nuk janë vënë re raste të tjera shkeljesh të së njëjtës natyrë dhe kriteret e standardet ligjore janë të përmbushura për të gjithë nxënësit e tjerë të shkollave jopublike.
