Policia italiane njofton se ka arrestuar një çift shqiptarësh, të cilët po transportonin një sasi të madhe lënde narkotike të llojit kokainë.
Sipas të dhënave paraprake, drogë e pastër u kap në territorin e Marina di Chieuti, në Foggiano, ku policia kishte ngritur një postbllok për kryer kontrolle për trafikun e paligjshëm të lëndëve narkotike.
Gjatë kontrolleve, oficerët vunë re një makinë me targa suedeze që sapo kishte ndaluar në një servis pranë San Severos. Dy personat në bord, një burrë dhe një grua me origjinë shqiptare me pasaportë suedeze, të dy 35 vjeç, fillimisht vëzhguan me kujdes zonën, më pas gruaja doli nga makina për t’u kthyer pas pak minutash, ndërsa burri qëndroi brenda.
Operativët dyshuan për sjelljen e tyre dhe vazhduan me kontrollin. Në atë moment dy shqiptarët kanë filluar të shfaqin shenja nervozizmi. Kështu, me mbështetjen e njësisë së qenve, është kryer kontrolli i mjetit, ku në fund janë gjetur 26 kg kokainë.
Droga e sekuestruar ishte mbështjellë me foto të mafiozit famëkeq “Al Capone” dhe llogaritet se nëse do të dilte në treg do të kapte shifrën rekord prej 5 milionë eurosh.
