Një grup që merrej me trafikimin dhe shpërndarjen e drogës është goditur nga Policia në Itali. Mësohet se grupi përbëhej nga drejtuesi, katër shqiptarë, një maqedonas dhe një grua italiane, nga Peruxhia.
Katër nga të arrestuarit akuzohen për trafik droge dhe grup kriminal, të gjithë dyshohet se i përkasin një grupi kriminal shqiptar të dedikuar për trafikun e drogës, edhe ndërkombëtar, i specializuar veçanërisht në shitjen e kokainës dhe marihuanës, me bazë në Via Emilia, midis Reggio dhe Modena.
Ndërsa dy të tjerët, përfshirë një grua shqiptare dhe një 56-vjeçare italiane, do të duhet të përgjigjen për pastrim parash. Drejtuesi i supozuar i organizatës, i cili e menaxhonte drejtpërdrejt nga Shqipëria – tashmë është në burg me një dënim të shkallës së parë prej 11 vjet e 6 muaj pasi u arrestua në Ferrara.
Gjatë hetimeve dhe kontrolleve që kishin të bënin me territoret e Reggio, Modena, Bolonja, Parma, Brescia, Ferrara dhe Varese, por pjesërisht edhe në Veneto – u sekuestruan 79,000 euro para të gatshme, të fshehura në një ndarje të fshehtë të një makine të drejtuar grua e arrestuar dhe e ndaluar në Venecia, gati për t’u nisur drejt Shqipërisë ku pritej nga drejtuesit e organizatës.
Gjithashtu, u gjetën 34 kg marijuanë, sërish në një makinë në Modena si dhe tre kg kokainë në një automjet tjetër në Reggio Emilia. Këto ngarkesa i shtohen trilogjisë së operacioneve nga të cilat rezultoi ky rasti i fundit i arrestimeve, nisur që nga viti 2014.
Nga operacioni “Exit” (33 arrestime dhe sekuestruar tre kuintalë drogë, mes tyre 186 kg hashash) te “Rexit” (27 masa paraprake ) dhe më shumë 14 kg drogë, përfshirë 9 kg heroinë; deri te “Trexit” në janar 2021 me 20 masa paraprake, 300 kg hashash të sekuestruara në total, 25 kg kokainë, 31 kg marihuanë, katër armë të mbajtura në mënyrë të paligjshme, 200.000 euro cash si dhe shtatë makina me funde sekrete të dyfishta (nga këto, tre i janë besuar policisë si makina shërbimi).
