Detaje të reja kanë dalë nga ngjarja e rëndë në Kamzë, ku një 55 vjeçare dyshohet se i dha fund jetës në banesën e saj .
Nga verifikimet sipas policisë ka rezultuar që 55-vjeçarja dyshohet të jetë vetëvarur në datën 4 Shtator rreth orës 15:00.
Lidhur me këtë ngjarje policia ka ndaluar bashkëshortin e viktimës, 56-vjeçarin Shefqet Lika ku sipas policisë bashkëshorti i viktimës nuk e ka kallëzuar ngjarjen në polici, por në mbrëmje njoftoi familjarët e 55-vjeçares të cilëve u kishte thënë se ajo ka pësuar vdekje natyrale dhe ndaj kishte bërë gati të gjitha procedurat e varrimit.
Për mediat të afërmit e viktimës kanë bërë me dije se 55 vjeçarja është dhunuar prej 30 vitesh nga Lika.
“Ka 30 vjet që ha bukë e gjak ajo e shkreta”, tha dëshmitarja.
Ashtu si policia e cila ndaj 56 vjeçarit ka ngritur akuzat “Shkaktimi i vetëvrasjes” dhe “Veprime që pengojnë zbulimin e së vërtetës”, edhe të afërmit dyshojnë se ai e ka detyruar të varë veten.
Ai ka bërë çdo përpjekje që vdekja e gruas te të afërmit të shihet si natyrale por është zbuluar në ditën e funeralit pasi vëllezërit e saj kanë hapur arkivolin dhe kanë parë shenjat në qafë.
“Për fat të keq ajo grua u vra nga dora e burrit që ushtronte dhunë ndaj saj prej sa e sa vitesh. Vëllezërit e saj gjatë varrimit kanë hapur arkivolin dhe kanë parë shenjat në qafë dhe kanë lajmëruar poilicinë. Si shkaktar është arrestuar burri i saj”, shtoi më tej dëshmitarja.
Madje një tjetër dëshmitar shprehet se bashkëshorti kishte paguar edhe morgun që të plotësonte letrat sikur ishte vetëvrarë.
