Në mes të një debati në parlamentin e Lihtenshtajnit të enjten pasdite, u ndje një tërmet me magnitudë 4.1 ballë, në një kohë kur deputetët po debatonin nëse kombi i vogël evropian duhet ta bëjë të detyrueshëm, sigurimin në rast tërmetesh.
Videoja e publikuar nga Landtag tregon se si dy lëkundje u ndjenë në ndërtesë brenda pak sekondash.
Tërmeti i parë shkaktoi një buzëqeshje tek ligjvënësja e FBP, Bettina Petzold-Mähr, e cila ishte duke folur.
Policia e Lihtenshtajnit tha se kishte marrë një “numër të madh telefonatash nga qytetarë të shqetësuar” pas tërmeteve, të cilët ishin me magnitudë 2.4 dhe 3.9 ballë. “Deri më tani nuk ka të lënduar apo dëme materiale”, shtoi Policia në një deklaratë.
Sipas Qendrës Sizmologjike Evropiane-Mesdhetare, lëkundja më e madhe qe në orën 13:57 CEST, me një epiqendër rreth 19 kilometra në jug të qytetit austriak Dornbirn.
Tërmetet raportohet se janë ndjerë në pjesë të Austrisë dhe Zvicrës, si dhe në shtetet jugore të Gjermanisë, Bavari dhe Baden – Württemberg.
Në tetor 2020, kryeministrja e Islandës Katrin Jakobsdottir iu ndërpre fjala gjatë një interviste për shtyp kur një tërmet me magnitudë 5.6 goditi vendin.
Më herët atë vit, kryeministrja e Zelandës së Re Jacinda Ardern iu pre fjala gjithashtu nga një tërmet gjatë një interviste televizive të drejtpërdrejtë.
