Presidenti i Rusisë, Vladimir Putin ka deklaruar se vendet myslimane janë “partnerët tradicionalë të Moskës, në përpjekjen e saj për ndërtimin e një bote më demokrate”.
Një deklaratë që duket më tepër si hipokrizi në një kohë kur Rusia ka pushtuar një shtet tjetër të pavarur dhe ushtron represion ndaj qytetarëve rusë që ngrenë zërin për padrejtësi, duke aplikuar censurën thuajse të plotë.
Në një mesazh për pjesëmarrësit e Samitit Global të Rinisë Kazan 2022, një ngjarje nga Organizata e Bashkëpunimit Islamik (OIC), Putin tha se zgjedhja e kryeqytetit të Republikës Ruse të Tatarstanit, Kazan, si kryeqytet rinor i OIC konfirmoi nivelin e lartë të bashkëpunimin ndërmjet Moskës dhe organizmit ndërkombëtar.
“Shtetet e botës islame janë partnerët tanë tradicionalë në adresimin e shumë çështjeve urgjente në agjendën rajonale dhe globale, në përpjekjet për të ndërtuar një rend botëror më të drejtë dhe demokratik,” tha Putin.
Samiti Global i Rinisë Kazan organizohet për të rinjtë myslimanë me qëllim që t’i mbajë ata të informuar dhe të lehtësojë ndërveprimin me rajone dhe kultura të tjera.
