Sezoni i ri shkollor do t’i gjejë këtë vit shkollat në Shqipëri dhe Kosovë me abetare të unifikuar. Media kosovare RTK ka publikuar për herë të parë kopertinën e abetares që do të shpërndahet këtë vit në të gjitha shkollat e vendit tonë dhe në Kosovë.
Abetarja e publikuar nga shtëpia botuese ‘Dukagjini’ është tashmë gati, ajo është shtypur dhe pritet që të jetë në duart e vogëlushëve që do të nisin këtë vit klasën e parë. Shtëpia botuese bën me dije për RTK se në shkollat e Kosovës ka nisur shpërndarja e abetares në disa zona rurale, ndërsa pritet shpërndarja edhe në shkollat e qyteteve gjatë kësaj fundjave.
Kryenin vjedhje nëpër banesa në Tiranë, në pranga një 19-vjeçar dhe një në kërkim
Gazetarja e Report Tv, Enxhi Musaj ka mësuar se më datë 1 shtator në Kosovë do të mbahet një ceremoni në Kosovë për të bërë publikimin e abetares së re. Ceremonia do të mbahet më herët për shkak se sezoni shkollor në Kosovë fillon më herët, më datë 1 shtator, ndryshe nga vendi ynë që sezoni shkollor nis më 12 shtator.
Zëvendësministri i Arsimit në Kosovë, Dukagjin Pupovci ka thënë se është punuar më shpejt për abetaren në mënyrë që të ishte gati për nxënësit në Kosovë.
“Ne kemi pasur kujdes, sepse kalendari i fillimit të vitit shkollor nuk është i njëjtë në Kosovë dhe Shqipëri dhe kemi kërkuar që puna të përfundojë me herët, në mënyrë që Abetarja të jetë e gatshme për 1 shtator, kur edhe zyrtarisht fillon mësimi në Kosovë”, tha Pupovci për Radio Kosova.
Abetarja e unifikuar vjen si zbatim i marrëveshjes së nënshkruar mes qeverive të dy vendeve.
