Forcat ruse nuk kanë bërë asnjë përparim në kapjen e zonave të fundit të mbetura të rajonit të Donbasit, është shprehur ish-drejtori i Institutit Mbretëror të Shërbimeve të Bashkuara, profesor Michael Clarke.
Duke folur për Sky News, analisti i sigurisë dhe mbrojtjes tha se ofensiva në rajonin Donbas të Ukrainës lindore kishte bërë që forcat ruse të merrnin qytetet Lysychansk dhe Severodonetsk dhe objektivi i tyre i ardhshëm ishte kapja e Slovianskut dhe Kramatorskut.
“Rusët nuk kanë bërë asnjë përparim drejt kësaj në dy javët e fundit dhe kështu ata kanë marrë dy të tretat e Donbasit, por nuk kanë bërë asnjë përparim në përpjekjen për të marrë një të tretën tjetër, të cilën ata qartë mendojnë se duan ta bëjnë,” tha Clarke.
Clarke shtoi se në qytetin jugor të Khersonit, trupat ukrainase kishin hapur një ofensivë të madhe dhe kishin shkatërruar urat – duke i ndërprerë forcat ruse nga furnizimet atje.
