Kërkesa në rritje për kokainë në Evropë po nxit ndryshime në rrjetet globale të prodhimit të drogës dhe kriminelët evropianë po prodhojnë tani kokainë dhe metamfetaminë në terrenin e shtëpisë së tyre me ndihmën e bashkëpunëtorëve të tyre në Amerikën Latine.
Carolina Sampó, koordinatore e Qendrës së Argjentinës për Studimet Transnacionale thekson se trafikimi i narkotikëve midis Amerikës Latine dhe Evropës kryhet përmes mafias shqiptare dhe asaj italiane.
“Shpërndarja në Evropë trajtohet nga organizata të tilla si mafia shqiptare apo italiane. Megjithatë, kartelet kolumbiane dhe meksikane kanë ndikimet e tyre. Kolumbianët marrin pjesë në këtë shkëmbim sepse prodhimi më i madh i kokainës është në vendin e tyre. Meksikanët kanë shumë përvojë në trafikimin nga Kolumbia në Shtetet e Bashkuara, Afrikë dhe Evropë. Në fakt, u zbulua se organizatat kriminale meksikane ishin të ngarkuara me trekëndëshin e kokainës përmes Afrikës për ta trafikuar në Shtetet e Bashkuara, sepse kjo reduktoi mundësinë e sekuestrimit të dërgesave të tyre”, shprehet Sampo.
“Mbiprodhimi i kokainës në Kolumbi i shtyn organizatat kriminale të shikojnë gjithnjë e më shumë drejt Evropës, ku çmimi i kokainës është gjithashtu më i lartë se në Shtetet e Bashkuara”, shprehet Martin Verrier, ndihmësprofesor në Qendrën Evropiane në George C. Marshall.
Shumica e prodhimit të kokainës kryhet në Kolumbi, Bolivi dhe Peru; megjithatë, analiza e re ka nxjerrë në dritë se si kokaina po përpunohet tani në Evropë, kryesisht në Belgjikë, Spanjë dhe Holandë.
“Ky fluks në rritje në Evropë reflektohet në statistikat e EMCDDA, të cilat tregojnë një rritje të pastërtisë së kokainës së kapur dhe demonstrojnë një rritje të furnizimit” tha Verrier.
Nga ana e tij, Alexis Goosdeel, drejtor i EMCDDA, shkruan se Evropa po përballet me një kërcënim në rritje nga një treg më i larmishëm dhe dinamik i drogës, i nxitur nga bashkëpunimi më i ngushtë midis organizatave kriminale evropiane dhe ndërkombëtare. Laurente Laniel, analist i lartë shkencor në EMCDDA tha për InSight Crime (organizatë që studion krimin e organizuar në Amerikën Latine dhe Karaibe) se “baza e kokainës që përdoret në Evropë trafikohet në materiale transportuese, të fshehura kimikisht brenda strukturës së materialeve të tilla si plastika , qymyri druri etj. Kjo e bën kokainën më të vështirë për t’u zbuluar nga forcat e policisë”
Ndërkohë që kërkesa në tregun evropian vijon të rritet, kontinenti shërben gjithashtu si një portë për në Lindjen e Mesme dhe Azinë, ku çmimi për kilogram i kokainës është shumë më i lartë se në Shtetet e Bashkuara. Ndërkaq, sipas studiuesve narkotrafikantët holandezë sigurojnë që laboratorët të krijohen me të gjitha pajisjet dhe kimikatet e nevojshme dhe të kujdesen për asgjësimin e mbetjeve, ndërsa meksikanët ofrojnë ‘kuzhinierët’ e tyre që kanë ekspertizën e nevojshme për të prodhuar metamfetaminën kristal me cilësi të lartë.
“Kjo rezulton në nivele rekord të disponueshmërisë së drogës, rritje të dhunës, korrupsionit dhe rritjes së problemeve shëndetësore. Ne duhet të ndërmarrim veprime më të koordinuara jo vetëm në Evropë, por edhe me partnerët tanë ndërkombëtarë në vendet prodhuese dhe transitore,” tha Goosdeel.
