Prokuroria bullgare, ka njoftuar Ministren e Jashtme Teodora Genchovska për aktivitete të parregulluara të inteligjencës, që dyshohet se janë kryer nga një diplomat rus.
Sipas deklaratës së lëshuar nga zyra e prokurorisë të premten, thuhet se i dyshuari është sekretari i parë i ambasadës ruse.
“Prokurori i Përgjithshëm ka informuar ministrin e Jashtëm për provat, të cilat janë mbledhur gjatë hetimit, për krimin e dyshuar të kryer nga një përfaqësues i misionit diplomatik të Federatës Ruse në Sofje, me qëllim marrjen e masave në kompetencën e tij”, thuhet në deklaratë.
Më herët, Agjencia Shtetërore e Bullgarisë për Sigurinë Kombëtare, njoftoi gatishmërinë e saj për të dëbuar diplomatët rusë që ishin të përfshirë në spiunazh.
Shefi i agjencisë, Plamen Tonçev, tha se dy anëtarë të stafit të agjencisë së tij, dyshoheshin se kishin spiunuar për Rusinë. Ai paralajmëroi se pas atij rasti, diplomatët rusë që pretendohet se kishin marrë informacion të klasifikuar nga punonjësit e agjencisë,do të shpalleshin “non grata”.
Ndërkaq, ambasada ruse ka deklaruar se nuk ka marr asnjë njoftim zyrtar.
“Deri më tani nuk kemi marrë asnjë njoftim zyrtar për këtë temë”, tha zëdhënësi.
