Vjollca Dashi denoncoi në “Stop” historinë e saj të dhimbshme. Në 17 Gusht 2021 rreth orës 19:00 merr lajmin më të kobshëm të jetës së saj. Vajza e vetme kishte ndërruar jetë.
“Doralda u ngrit në mëngjes si gjithë ditët e tjera edhe do shkonte për në punë. U bë gati, më tha më mbush një shishe me ujë dhe ma fut në çantë sa të vishem nga dhoma tutje. Ia mbusha shishen me ujë, ia vura tek tavolina aty. I thashë, të të jap mami ndonjë Lekë. Ja 1 mijë Lekë tha. Unë në fakt nuk kisha shumë, por ia dhashë, ia futa tek çanta gocës. U vesh, u bë gati edhe iku. Pasdite marr në telefon gocën, kur e hap telefonin dhe del zë burri. Ç’është ky zë burri thashë në telefon që merr vajzën time. Unë tha jam policia. Thashë ç’ne, ç’do goca ime në polici. Më tha që goca ka bërë aksident me makinë. Thashë unë si ka bërë aksident goca ime me makinë. I thashë që vajzën time e ka vrarë Erald Bodini, ish-burri”.
Edhe pse i thanë se vajza ishte gjetur e varur te kodrat e liqenit, Vjollca deklaron, se dyshon që të bijën e ka vrarë ish-bashkëshorti i saj, Erald Bodini, i cili edhe më parë e kishte kërcënuar me atë.
“Sepse para një jave e ka kërcënuar me jetë. Ka qenë edhe i dënuar për dhunë në familje. Është i dënuar me 6 muaj burg dhe e ka hedhur në Apel. Se çfarë ka bërë atje nuk e di, është i lirë”.
Sipas dëshmive të pronarit dhe shoqeve të saj, atë ditë ishte e revoltuar sepse kishte folur dhe shkëmbyer mesazhe me ish-burrin, madje kishte marrë leje për të dalë më herët nga puna.
“Pronarin e vajzës e kemi takuar. Tani sa kam ardhur nga OPGJ se unë kam këtu 5 vajza që punojnë me të, ka folur gjatë gjithë ditës në telefon, ka çuar edhe mesazhe. Në orën 4 e 15 më ka marrë në telefon vajza dhe më ka thënë që “shef më jep leje çerek ore përpara” dhe vajza ka dalë në telefon në dorë pa ju folur, pa i thënë dhe vajzave mirupafshim. Në orën 5 gjendet e varur”.
Stop ka siguruar disa pamje filmike ku tregojnë një orë përpara Doraldën gjallë, duke ardhur rrugës për tek liqeni i Tiranës.
Trupi i pajetë i vajzës u gjet nga një kalimtar tek liqeni. 7 muaj pas ikjes nga jeta të Doralda Dashit, prindërit e të ndjerës nuk dinë se çfarë ka ndodhur me vajzën e tyre.
“Pastaj dola mora një makinë. Vajta tek QSUT, atje më thanë është në Laprakë. Në orën 22:00 arritëm që pamë gjithçka çfarë kishte ndodhur”.
Vjollca Dashi akuzon OPGJ Artan Llupa për prishje të hetimeve. Çanta e viktimës nuk u mbajt si provë materiale, por iu dha prindërve të së ndjerës.
“Kuleta e Doraldës e cila kishte vetëm 80 lekë brenda. I pata dhënë 100 lekë. 20 lekë i ka prishur dhe 80 lekë janë këtu brenda. Ja, këto janë lekët”.
“Stop” ka konstatuar se degët e pemëve ku është varur 33-vjeçarja janë prerë, me shumë gjasë, për të tjetërsuar dinamikën e kësaj ngjarjeje./tvklan.al
