Është mbyllur protesta kundër rritjes së çmimeve e cila fillopi ditën e sotme në orën 11:00 duke marshuar nga sheshi “Skënderbej” drejt kryeministrisë.
Protestuesit janë drejtuar me të njëjtat kërkesa dhe pas disa orëve qëndrimi në shesh janë shpërndarë për t’u riorganizuar sërish në një orë më vonë gjatë mbrëmjes. Por organizimi i tyre ka qenë i pamundur pasi forcat e policisë ndërhynë për të larguar grupin e protestuesve që ishte rigrupuar, me arsyetimin se nuk kishin dorëzuar njoftim për bllokimin e rrugëve pas orës 19:00.
Kjo ka shkaktuar përplasje mes efektivëve dhe protestuesve të cilat më vonë deklaruan se do të ndiqnin me hapa ligjorë dhunën që policia kishte ushtruar ndaj tyre.
Përmes një deklarate, aktivisti Ervin Goci u shpreh se nga qeveria nuk ka asnjë reflektim për kërkesat e protestuesve dhe deklaroi se protesta do të vazhdojë sonte dhe ditët në vijim.
Goci u shpreh gjithashtu se nëse përsëriten aktet që u shënuan sot pasdite, qytetarët do të tregojnë forcën.
“Sa herë ne bëjmë pushim, rritet çmimi i naftës, lëviz, qeveria bën cirk dhe fyen. Ne duam që kjo protestë, siç edhe e kemi lajmëruar që në tetor, nuk ndalon. Sot Policia e Shtetit erdhi dhe ndaloi një protestë legjitime, të cilën ne për arsye të ndryshimit të planit e kemi njoftuar dhe ata e injoruan totalisht duke sjellë forcat e policisë për të na shtyrë me dhunë.
Sigurisht që këtu janë numrat e mjaftueshëm për t’iu kundërpërgjigjur kësaj dhune, por ne kemi ardhur për një gjë më madhore se kjo, sepse e kemi direkt me atë që është në krye të qeverisë dhe kemi ca kërkesa që janë politike të cilat sot kumbojnë në trurin dhe mendjen e çdo lloj shqiptari. Nuk janë kërkesa tonat dhe të disave. Janë kërkesa që në një javë që sheshi ka gëluar dhe janë thënë fuqishëm.
Ky dialog është me të gjithë qytetarët e Republikës, jo thjesht me ne. Nëse nuk ka asnjë avancim për këto kërkesa, ne nuk kemi ndërmend që të bëjmë një hap pas. Çdo ditë që kalon, çdo kundër-reaksion i policisë, do të prodhojë një kundër-reaksion tjetër. Po e lajmërojmë që, nëse kjo vazhdon kështu, dhe ne na cenohet e drejta, njerëzit do të tregojnë forcën, qoftë edhe fizikisht për të ruajtur në radhë të parë të drejtën e protestës, interesin tonë, ne nuk pranojmë që të trajtohemi si hiç, sikur kemi kryer një turp dhe të trajtohemi sikur jemi të dobët.
Ne jemi absolutisht të gatshëm të luftojmë për të gjitha të drejtat tona.
Ju e shikoni që këtu ka thirrës, por organizatorë të kësaj proteste janë të gjithë shqiptarët, për ne janë të gjithë bashkë.
Ata nuk na tutin, nuk na frikësojnë.
Unë nuk dola këtu të mbyll protestën, sepse sheshi është i hapur, hapësira publike është e qytetarëve dhe herën tjetër që do të vijnë të na pengojnë do të jemi ndoshta pak më shumë, le t’i bëjnë llogaritë mirë.
Protesta vazhdon sot, do të vazhdojë ditët në vijim, nuk ka më ndalim. Shqipëria ka hyrë në një periudhë jo se populli u zgjua papritur, por e keqja ka prekur në kockë dhe nuk ka më kthim pas. Policëve do ju themi që s’do t’ju lëmë të qetë“, u shpreh Goci.
