Presidenti i Federatës Shqiptare të Futbollit, Armando Duka ka ndryshuar datën e zgjedhjeve të cilat ishin përcaktuar të mbaheshin në 2 mars.
Kujtojmë se më herët gjatë ditës së sotme, gjykata e Tiranës ka vendosur të pezullojë nga detyra Armand Dukën së bashku me 2 zyrtarë të tjerë të FSHF. Në njoftimin e publikuar Duka tha se si pasojë e vendimeve gjyqësore të cilat janë të detyrueshme për t’u zbatuar, do të propozojë që Asambleja e Përgjithshme Zgjedhore të shtyjë datën e zgjedhjeve për president të Federatës Shqiptare të Futbollit.
Postimi i Plotë nga presidenti i FSHF, Armand Duka:
Të nderuar miq,
Komiteti Ekzekutiv i Federatës Shqiptare të Futbollit ka vendosur thirrjen e Asamblesë së Përgjithshme Zgjedhore më datë 2 mars 2022, me një rend dite siç e parashikon Statuti i FSHF-së: miratimin e bilancit financiar, miratimin e buxhetit, miratimin e raporteve të auditorëve të pavarur dhe zgjedhjet për organet drejtuese, për President dhe anëtar të Komitetit Ekzekutiv për katër vitet e ardhshme.
Duke qenë dëshmitar të një procesi të ndërlikuar me debate e akuza, por edhe disa vendime gjyqësore, përfshirë dhe atë për Shoqatën Rajonale të Futbollit Tiranë që duhet të respektohen detyrimisht, unë do t’i propozoj dhe do t’i kërkoj Asambles që pikën e rendit e ditës për zgjedhjet e organeve drejtuese të FSHF për President dhe anëtar të Komitetit Ekzekutiv, të shqyrtohen në një datë tjetër.
Uroj që kjo periudhë t’i shërbej një procesit të rregullt statutor dhe gjithë kandidatëve për të shpalosur platformat e tyre përballë komunitetit të futbollit.
Armand Duka
