Bordi i Transparencës ka publikuar çmimet e reja të karburanteve, duke vendosur që nafta të shitet me 201 lekë për litër dhe benzina me 160 lekë për litër. Në mbështetje të Vendimit të Këshillit të Ministrave nr. 711, datë 16.09.2026, dhe në zbatim të nenit 21/3 dhe nenit 21/5 të Ligjit 8450, datë 24.2.1999 “Për përpunimin, transportimin dhe tregtimin e naftës, të gazit dhe nënprodukteve të tyre”, si dhe të Aktit Normativ nr. 1, datë 3.4.2026 për ndryshime në ligjin nr. 61/2012 për akcizat, Bordi zhvilloi mbledhjen e tij të radhës më 19 nëntor 2026.
Vendimet e Bordit përcaktojnë çmimet maksimale të shitjes me pakicë dhe me shumicë për nënproduktet e naftës dhe gazit: çmimi i shitjes me pakicë për nënproduktin gazoil standard SSH EN 590 është jo më shumë se 201 lekë/litër, ndërsa çmimi i shitjes me shumicë jo më shumë se 189 lekë/litër. Për nënproduktin benzinë standard SSH EN, çmimi i shitjes me pakicë vendoset jo më shumë se 160 lekë/litër dhe ai i shitjes me shumicë jo më shumë se 148 lekë/litër. Për nënproduktin gaz, çmimi i shitjes me pakicë është 71 lekë/litër dhe çmimi i shitjes me shumicë 59 lekë/litër për automjetet. Gjithashtu, çmimi i gazoilit për aktivitetin e peshkimit përcaktohet në 105 lekë/litër.
Çmimet e miratuara hyjnë në fuqi më 19 nëntor 2026 në orën 14:00 dhe do të mbeten të vlefshme deri në mbledhjen e ardhshme të Bordit, ku do të përcaktohen ndryshimet e çmimeve të shitjes. Bordi tërheq vëmendjen e çdo operatori të shitjes me shumicë dhe pakicë për detyrimin e zbatimit të këtij vendimi. Në rast të shkeljeve të konstatuara, parashikohet pezullimi i aktivitetit të operatorëve të ndryshëm.
Ministria e Ekonomisë dhe Inovacionit, së bashku me Ministrinë e Financave dhe Ministrinë e Infrastrukturës dhe Energjisë, janë angazhuar për të mbrojtur interesat e konsumatorëve shqiptarë dhe për ruajtjen e parimeve të konkurrencës së ndershme në treg.

